މާލެ ސިޓީގެ މަގުތަކުގައި ފެން ހަރުލާ ސަރަހައްދު ތަކުގެ ކާނުތައް ސާފުކޮށް، އެ ސަރަހައްދު ތަކުގައި ފެން ހިންދުމަށް ހޮޅިއަޅާ ގުޅުވައި މަރާމާތުކުރުމުގެ މަސައްކަތް މިހާރު ވެސް ކުރަމުން އަންނަކަމަށް، މާލެ ސިޓީ ކައުންސިލުން ބުނެފިއެވެ.  

މި މަސައްކަތްތައް ކުރިއަށްދާގޮތް ބައްލަވާލެއްވުމަށް، ހުކުރު ދުވަހުގެ ރޭ މާލެ ސިޓީގެ މޭޔަރ އާދަމް ޢާޒިމާއި ޑެޕިއުޓީ މޭޔަރ މުޙައްމަދު ޢަރީޝްގެ އިތުރުން ގަލޮޅު ދެކުނު ދާއިރާގެ ކައުންސިލަރު އިބްރާހިމް މުޙައްމަދާއި  ހުޅުމާލެ ދާއިރާގެ ކައުންސިލަރު ޢަލީ އައިމަން، މަސައްކަތް ހިނގާ ސަރަޙައްދަށް ވަޑައިގެންނެވިއެވެ. 

ކާނު ސާފު ކުރުމާއި ފެންހިންދާ ހޮޅި ގުޅުވުމުގެ މަސައްކަތައް މާލޭގެ ތިން ސަރަހައްދެއްގައި ދަނީ ކުރަމުންނެވެ. އެ ގޮތުން ގ. މަޖީދީމަގު (އަތަމާޕެލަސް ކުރިމަތީ) ހަރުލާ ފެންގަނޑު ހިންދުމަށް ޓަކައި، ފާށަނާކިލެގެފާނުމަގުގެ ކާނުތަކާއި މަޖީދީމަގުގެ ކާނުތައް، ހޮޅިއަޅައިގެން ގުޅުވައި، އެ ސަރަހައްދުގެ މަގުތައް ވެސް އަންނަނީ ފެން ނުހެދޭނެ ހެން މަރާމާތު ކުރަމުންނެވެ. 

މީގެ އިތުރުން، މާލެ ސިޓީ ކައުންސިލުން އަންނަނީ، މަޖީދީމަގާއި ސޯސަން މަގުގެ ބައެއް ސަރަހަދުގެ ކާނުތައް ސާފުކޮށް، މަގު މަރާމާތު ކުރުމުގެ މަސައްކަތް ވެސް ކުރަމުންނެވެ. 

މިކަމާ ގުޅިގެން މޭޔަރ ޢާޒިމް، އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ވާރޭ ވެހުމުން މާލޭގައި ފެން ބޮޑުވާ މައްސަލައަކީ އެތައް  ދުވަހެއްވަންދެން  އިހުމާލުވެފައި  އޮތް  ކަމެއް ކަމަށާއި  ﷲގެ  ހެޔޮރަހުމަތުން މި ކަން،  ހައްލުކުރައްވާނެކަމަށެވެ. 

ވާރޭ ވެހޭ ދުވަސްވަރު މާލޭގެ މަގުތަކުގައި ފެން ބޮޑުވާ މައްސަލައަކީ، މާލެއަށް ދިމާވެފައިވާ އެންމެ ބޮޑު އެއް މައްސަލައެވެ. މި ކަމުގެ ސަބަބުން ރައްޔިތުންގެ ކަންބޮޑުވުންތަކާއި ޝަކުވާތައް އިތުރުވަމުންދެއެވެ. މާލޭގައި ފެން ބޮޑުވުމަށް ދިމާވާ މައިގަނޑު އެއް ސަބަބަކީ، ކާނުތައް ބެދުމުގެ ސަބަބުން ފެން ދައުރު ނުވެ، މަގުތަކުން ފެން ގަނޑު ނުހިނދުމެވެ. ގިނަ މަގުތަކުގެ ކާނުތަކަށް، ކުނިބުނި އެޅި ބެދެމުން އަންނައައުން ހުއްޓުވުމަށް، ކައުންސިލުން އަބަދު ވެސް އަންނަނީ މަސައްކަތް ކުރަމުންނެވެ. 

މާލޭގެ މަގުތަކުގައި ފެންބޮޑުވުމުގެ މައްސަލަ ހައްލު ކުރުމަށް މާލެ ސިޓީ ކައުންސިލުން ގިނަ މަސައްކަތް ތަކެއް ކުރަމުން އަންނައިރު، ދާދި ފަހުން ވަނީ ފެން ހިންދުމަށް، ޒަމާނީ ފެންވަރުގެ "ގްލޯބަލް" ދެ ޕަމްފު ވެސް ގެނެސްފައެވެ. އަދި ދާދި އަވަހަށް އެ ފަދަ އިތުރު ދެ ޕަމްޕު ގެނައުމަށް ވެސް ކައުންސިލުން ވަނީ ނިމައިފައެވެ. 

ކާނު ސާފުކުރުމާއި ފެން ހިންދާ ހޮޅި ވަޅުލުމުގެ އިތުރުން، ޒަމާނީ ފެންވަރަށް މަގުތައް ތަރައްޤީކުރުމުގެ މަސައްކަތް ވެސް، ހަލުވި ދުވެލީގައި، މާލެ ސިޓީ ކައުންސިލުން ކުރަމުން އަންނަކަން ފާހަގަ ކޮށްލެވެއެވެ. 

-