ގެދޮރުވެރިޔާ ސްކީމްގެ ދަށުން ޝަކުވާ ހުށަހެޅި ފަރާތްތަކަށް ފަސޭހަކޮށްދީ އެހީތެރިކަން ފޯރު ކޮށްދެއްވުމަށް މާލެ ސިޓީ ކައުންސިލްގެ ފަރާތުން ހެދި "ހެލްޕް ޑެސްކް" މެދުވެރިކޮށް 223 ފަރާތަކަށް އެހީތެރިކަން ފޯރު ކޮށްދެވިއްޖެއެވެ. 

މާލެ ސިޓީ ކައުންސިލުން މި މަސައްކަތް ކުރިއަށް ގެންގޮސްފައި ވަނީ މާޗް މަހުގެ 11 ވަނަ ދުވަހުން ފެށިގެން އޭޕްރީލް މަހުގެ 15 ވަނަ ދުވަހުގެ ނިޔަލަށް، ކައުންސިލްގެ ޢާންމު ޚިދުމަތްތަކާ ބެހޭ ބައިގައި މި ކަމަށް ޚާއްޞަ ބަޔަކު ބައިތިއްބައިގެންނެއެވެ. އެގޮތުން މި މުއްދަތުގެ ތެރޭގައި 223 ފަރާތަކަށް އެހީ ތެރިކަން ފޯރު ކޮށްދެއްވުނު އިރު، 156 ފަރާތަކަށް ވަނީ މިކަމާ ގުޅޭ މައުލޫމާތު ސާފު ކޮށްދެވި، ހައުސިން މިނިސްޓްރީގެ ގެދޮރުވެރިޔާ ފޯޓަލްއަށް ޝަކުވާ ހުށަހަޅަންވީ ގޮތް ކިޔައިދީފައެވެ. އަދި 67 ފަރާތެއްގެ ޝަކުވާ ފޯމް ކައުންސިލްގެ "ހެލްޕް ޑެސްކް" މެދުވެރިކޮށް ވަނީ ހުށަހަޅައިފައެވެ. 

މާލެ ސިޓީގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައި ދިނުމުގެ ގޮތުން ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމްގެ ދަށުން ފްލެޓްތައް ދިންގޮތުން ގިނަ ބަޔަކު ދަނީ ހިތް ހަމަނުޖެހުން ފާޅުކުރަމުންނެވެ. 

މި ކަމާ ގުޅިގެން، މީގެ ކުރިން މާލެ ސިޓީގެ މޭޔަރ އާދަމް ޢާޒިމް ވިދާޅުވެފައި ވަނީ، މި މައްސަލަތަކަށް ދާއިމީ ހައްލެއް ހޯދައިދިނުމަށް ޓަކައި، ބޯހިޔާވަހިކަމަށް ބާނުންވެފައި ތިއްބެވި މާލޭގެ ރައްޔިތުންނަށް ދޭން ނިންމި ގޯތިތައް ދީ، އެ ގޯތިތައް ދެވުނުތޯ ކަށަވަރުކޮށްދޭން ޖެހޭނެ ކަމަށެވެ. އަދި ހަމަޖެހިފައިވާ އުޞޫލުން  ބޭރުން، ޝަރުތު ހަމަނުވާ ބަޔަކަށް، ބިމާއި ގޯތި ބަހައިލުމަކީ ބަލައިގަނެވޭނެ ކަމެއް ނޫން ކަމަށް ވެސް، މޭޔަރ ޢާޒިމް ވިދާޅުވެފައެވެ. 

މީގެ އިތުރުން މޭޔަރ ޢާޒިމް ވިދާޅުވެފައި ވަނީ، ކަނޑައެޅިފައިވާ ހަމަތަކުގެ މަތިން އިންސާފުވެރިކަމާއެކު، ފުލެޓް ލިބިފައިވާ ރައްޔިތުންނަށް، އިތުރަށް ލަސް ނުކުރައްވައި އެ ބޭފުޅުންނަށް އެ ފުލެޓްތައް ދޭންޖެހޭނެކަމަށެވެ. 

ފުލެޓް ޝަކުވާ ހުށަހެޅުމަށް ކައުންސިލްގެ "ހެލްޕް ޑެސްކް" މެދުވެރިކޮށް ގިނަ ބަޔަކަށް އެހީތެރިކަން ފޯރު ކޮށްދެވިއްޖެ

މާލެ ސިޓީ ސާފުތާހިރިކޮށް ބޭއްވުމަށް، މާލެ ސިޓީ ކައުންސިލުން ކުރަމުން އަންނަ މަސައްކަތުގެ ތެރެއިން ކޮންމެ ދުވަހަކު 30 އާއި 40 ޓަނާ ދެމެދުގެ ކުނި ނެގޭ ކަމަށް، މޭޔަރ އާދަމް ޢާޒިމް ވިދާޅުވެއްޖެއެވެ. 

މޭޔަރ ޢާޒިމް މި ފަދައިން ވިދާޅުވީ، އެސްއެސް ޓީވީގެ "ބާރު ހަތަރެއް" ޕްރޮގްރާމްގައި މާލެ ސިޓި ކައުންސިލުން ކުރަމުން އަންނަ މަސައްކަތްތަކާ ގުޅޭގޮތުން ދެއްކެވި ވާހަކަ ފުޅުގައެވެ. 

މޭޔަރ ޢާޒިމް ވިދާޅުވީ، މާލެ ވިލިމާލެ ސާފު ތާހިރުކޮށް ބޭއްވުމަށް، ކައުންސިލްގެ މުވައްޒަފުން ކޮންމެ ދުވަހެއްގެ ހެނދުނުން ފެށިގެން، ދުވަސް ނިމެންދެން ކުނި ނެގުމުގެ މަސައްކަތް ކުރައްވަމުން އަންނަ ކަމަށާއި އެ ގޮތުން، މާލެއާއި ވިލިމާލޭގެ އެއްގަމާއި ފަޅުތެރެއިން، ދުވާލެއްގެ މައްޗަށް 30 ޓަނާއި 40 ޓަނާ ދެމެދުގެ ކުނި ނަގާ ކަމަށެވެ. 

" މާލެ އާއި ވިލިމާލެ ސާފުތާހިރުކޮށް ބޭވުމަށް ކޮންމެ ދުވަހަކު 30 ޓަނާއި 40 ޓަނާ ދެމެދުގެ ކުނި ނަގަން. މާލެ ވިލިމާލެ ސާފުތާހިރިކޮށް ބޭއްވުމަކީ ކައުންސިލްގެ ޒިންމާއެއް. "މޭޔަރ ޢާޒިމް ވިދާޅުވިއެވެ. 

މާލެއާއި ވިލިމާލެއިން ކުނި ނެގުމުގެ އިތުރުން، ރައްޔިތުންނަށް ފަސޭހަ ވާފަދަ، އެތަކެއް މަސައްކަތްތަކެއް ކައުންސިލުން ކުރަމުން އަންނަކަން ފާހަގަ ކުރައްވައި މޭޔަރ ޢާޒިމް ވިދާޅުވީ، މާލެއާއި ވިލިމާލޭގެ އެކި ސަރަހައްދުތަކުގައި ހުރި ކާނުތައް ސާފު ކުރުމުގެ މަސައްކަތް، މެދުނުކެނޑި ކުރިޔަށްދާ ކަމަށެވެ. 

މާލެ ސިޓީގެ ކޮންމެ މަގަކީ ސާފުތާހިރު ހިތް ފަސޭހަ މަގަކަށް ހެދުމަކީ މާލެ ސިޓީ ކައުންސިލުން ނުހަނު ބޭނުވާ ކަމެކެވެ.  މަގުތަކުގައި ހުންނަ ކާނުތަކުގައި ކުނި ގިނަވުމުގެ ސަބަބުން އެކި ދަތިތަކާއި ކުރިމަތިލާން ޖެހެއެވެ. އެ ކަމަށް ހައްލު ހޯދުމަށް މާލެ ސިޓީގެ މޭޔަރ ޢާޒިމްވަނީ މާލެ ސިޓީގެ މަގުތަކަށް ކުނި ފަދަ ތަކެތި ނޭޅުމަށް ތަކުރާރުކޮށް އިލްތިމާސް ކުރައްވައިފައެވެ.

މަގުތަކުގައި ފެން ބޮޑު ވުމަކީ ވެސް ކާނުތައް ފުރުމުގެ ސަބަބުން ކުރިމަތިވާ ކަމެއްކަން ފާހަގަކޮށްލެވެއެވެ. އަދި މި ކާނުތައް ކުނިން ފުރުމުން، މާލެއަށް ވާރޭވެހޭ  ކޮންމެ ފަހަރަކު ކާނުތަކުން ކުނި ބޭރުވެ މަގުތައް ހަޑިވެއެވެ. 

މީގެ އިތުރުން މޭޔަރ ޢާޒިމް ވިދާޅުވީ، މާލެ ސިޓީ ސާފު ތަނަކަށް ހައްދަވާނެ ކަމަށާއި، ރައްޔިތުން އެދޭ ފަދަ ރީތި މަގުތަކެއް ހޯއްދަވައިދެއްވާނެ ކަމަށެވެ.  އެ ގޮތުން، ކުރިއަށް އޮތް ތަނުގައި ސިޓީ ކައުންސިލުން ކުރަންޖެހޭ މަސައްކަތްތަކަށް ފޯކަސްކޮށްގެން ވަރަށް ބޮޑަށް މަސައްކަތްތައް ކުރިއަށް ގެންދާނެކަމުގެ ޔަގީންކަން ޢާޒިމް ދެއްވިއެވެ. 

މާލެއާއި ވިލިމާލެ ސާފުތާހިރުކޮށް ބޭވުމަށް ކޮންމެ ދުވަހަކު 30 ޓަނަށް ވުރެ ގިނަ ކުނި ނެގޭ: މޭޔަރ ޢާޒިމް 

މާލެ ސިޓީ ކައުންސިލުން މާލެ ސިޓީގެ ރައްޔިތުންނަށް،  50 ސްކޮލަރޝިޕްގެ ފުރުޞަތު ހުޅުވާލައިފިއެވެ.

މަސައްކަތްތެރިކާމާއި ފަންނީ ތަމްރީނު ހޯދުމަށް ތަފާތު ހަ ދާއިރާ އަކުން ހުޅުވާލި މި ފުރުޞަތުތަކަކީ މާލެ ސިޓީ ކައުންސިލާއި، ސްޓްރޯންގް ސިޓީސް ސައުތު އޭޝިއާ ރީޖަނަލް ހަބާ އެކު ވެފައިވާ އެއްބަސް ވުމެއްގެ ދަށުން މާލެ ސިޓީ ކައުންސިލުން ހޯދާފައިވާ ފުރުޞަތުތަކެކެވެ.

15 އޭޕްރިލް 2025 ވަނަ ދުވަހު ހުޅުވައިލައިފައިވާ މި ސްކޮލަރޝިޕް ފުރުޞަތު ތަކުގެ ތެރޭގައި، ޞިއްޚީ ދާއިރާއާއި، އިމާރާތް ކުރުމާއި، އިންޖެނިއަރިންގެ ދާއިރާއާއި، ތަޢުލީމީ ދާއިރާގެ އިތުރުން، އައިޓީ އަދި ޑިޖިޓަލް ދާއިރާ ހިމެނެއެވެ. މީގެ އިތުރުން ވެސް ވިޔަފާރީގެ ދާއިރާއާއި ހޮސްޕިޓަލިޓީ އަދި ކަސްޓަމަރ ކެއަރ ގެ އިތުރުން ދަނޑުވެރިކަމުގެ ދާއިރާއިން ފުރުޞަތު ހުޅުވާލާފައިވެއެވެ.

3 މަހާއި 6 މަހާ ދެމެދުގެ މުއްދަތަކަށް ކުރިޔަށް ގެންދިޔުމަށް ހަމަޖެހިފައިވާ މި ތަމްރީން ޕްރޮގްރާމްތައް އޮންނާނީ ޕާކިސްތާނުގައެވެ. މި ޕްރޮގްރާމްތަކަށް ހޮވޭ ފަރާތްތަކަށް، މާލެއިން  ޕާކިސްތާނަށް ދިއުމުގެ ދަތުރު ޚަރާދާއި، ހުރުމާއި ކެއުން އަދި ކޯސް ފީ ލިބިގެންދާނެއެވެ.

މި ސްކޮލަރޝިޕްތަކަށް މީހުން ހޮވުމުގައި އޯލެވެލް ނަތީޖާގެ އިތުރުން ޝޯޓްލިސްޓް ކުރެވޭ ފަރާތްތަކުގެ މެދުގައި ކުރެވޭ އިންޓަވިއު އިން ލިބޭ ނަތީޖާއަށް ބެލެވޭނެ ކަމަށް ސިޓީ ކައުންސިލުން ވަނީ ހަމަކޮށްފައެވެ.

މި ސްކޮލަރޝިޕްތަކުގައި ބައިވެރިވުމަށް ޝައުޤުވެރިވާ ފަރާތްތަކުން، އެޕްލިކޭޝަން ހުށަހެޅުމުގެ އެންމެ ފަހުގެ ތާރީޚަކީ، 20 އޭޕްރިލް 2025 ވަނަ ދުވަހެވެ. 

ސްކޮލަރޝިޕްތަކާ ގުޅޭ އިތުރު މަޢުލޫމާތު، މާލެ ސިޓީ ކައުންސިލުންގެ ގެޒެޓްގައި ޝައިޢުކޮށްފައިވާ އިޢުލާންތަކުން ނުވަތަ، 1622 އަށް ގުޅުއްވައިގެން ލިބޭނެއެވެ. 

މާލެ ސިޓީ ކައުންސިލުން 50 ސްކޮލަރޝިޕްގެ ފުރުޞަތު ހުޅުވާލައިފި

މާލެ ސިޓީގައި ހައްދާފައިވާ ގަސްތަކާއި މެދު އަމަލުކުރާނެ ގޮތެއް ހޯދުމަށް، ފަންނީ ލަފާ ހޯދުމަށް މާލެ ސިޓީ ކައުންސިލުން މަޝްވަރާކޮށްފިއެވެ.

މިއަދު ބޭއްވުނު މާލެ ސިޓީ ކައުންސިލްގެ 4 ވަނަ ދައުރުގެ 190 ވަނަ ޖަލްސާގައި، ދެމެހެއްޓެނިވި ގޮތެއްގައި ގަސްތައް ބެލެހެއްޓުމާއި، އަދި ގަސްތަކާމެދު ޢަމަލުކުރާނެ ގޮތެއް ހޯދުމަށް ފަންނީ ލަފާ ހޯދުމުގެ މުހިއްމު ކަމާ ބެހޭ ގޮތުން މޭޔަރ އާދަމް ޢާޒިމް ވަނީ ވާހަކަފުޅު ދައްކަވާފައެވެ. 

މި ކަމަށް ތާއިދު ކުރައްވާ މާލެ ސިޓީގެ ބައެއް ކައުންސިލަރުން ދެއްކެވި ވާހަކަ ފުޅުގައި، ގަސްތައް ހެދި ބޮޑުވެ، ގަހުގެ ބޭނުން އެންމެ ބޮޑަށް ހިފަން ޖެހޭ ވަގުތު ގަސްތައް ކަނޑާލަން ޖެހޭ ކަމަށާއި، އެހެން ނަމަވެސް އެ ގޮތަށް ގަސްތައް ކަނޑާލުމުގެ ބަދަލުގައި، ގަސްތައް މެނޭޖް ކުރާނެ އުސޫލެއް ކަނޑައެޅުމަކީ މުހިއްމު ކަމެއް ކަމަށް ފާހަގަ ކޮށްފައިވެއެވެ. 

އަދި މީގެ އިތުރުން މާލެއަކީ ޖާގައިގެ ގޮތުން ކުޑަ ތަނެއް ކަމުން ގަސްތައް އިންދުމުގައި ބަލަން ޖެހޭ ކަންކަން ހުރި ކަމަށާއި، މާލޭގެ އެކި ސަރަހައްދު ތަކުގައި މިހާރު ހުރި ގަސްތަކަކީ، ވަރަށް ބިޔަކޮށް ހެދޭ ގަސްތަކެއް ކަމުން، އެކަމުގެ އުނދަގޫ އެކި ގޮތްގޮތުން ރައްޔިތުންނަށް ކުރާ ކަމަށް ވެސް ބައެއް ކައުންސިލަރުން ވަނީ ފާހަގަ ކޮށްފައެވެ.

"މިހެން ދިމާވާން ޖެހެނީ ގަސްތައް ހެދިފައި ހުންނަ އިރު އެއް ފަޅީގައި ހުންނަނީ އިމާރާތައް އަދި ގަސްތައް ކޮށާއިރު އަބަދު ވެސް އެއްފަޅިން ކޮށަން މިޖެހެނީ އެހެންވިމާ ގަސް މި އޮންނަނީ އަރިއަޅާލައިފައި" ،މޭޔަރ ޢާޒިމް ވިދާޅުވިއެވެ. 

މާލޭގައި ހުރި ގިނަ ގަސްތައް ދުވަސްވެފައިވުމުން ގަހުގެ ރީތިކަން ގެއްލިފައިވާކަމަށާއި ގަސްތަކުގެ މޫތައް ގެތަކަށް ވަދެ ފާޚާނާ ހޮޅިތައް ބެދުމުގެ މައްސަލަ ދިމާވާ ކަމުގެ ޝަކުވާ ރައްޔިތުންގެ ފަރާތުން ލިބޭ ކަމަށް ވެސް މޭޔަރ ޢާޒިމް ވިދާޅުވިއެވެ. 

އެހެންކަމުން މާލޭގައި ހެއްދޭ ގަސްތަކަކީ، މާލޭގެ މަގުތަކަށް އެކަށީގެންވާ ގަސްތަކެއްތޯ ބަލައި އެ މަޢުލޫމާތު ހޯދައިގެން ކުރިޔަށް ގެންގޮސްފިނަމަ ކުރިޔަށް އޮތް ތަނުގައި ބޮޑެތި ފަސޭހަތަކެއް ލިބިގެންދާނެ ކަމަށް މޭޔަރ ވިދާޅުވިއެވެ.

ގަސްތަކާއި މެދު އަމަލުކުރާނެ ގޮތެއް ހޯދުމަށް ފަންނީ ލަފާ ހޯދަނީ 

މާލެ ސިޓީގެ ހަނި ގޯޅިތަކުގައި ހުރި ގެތަކުގައި ދިރިއުޅުއްވާ ބޭފުޅުންނަށް ހިތްފަސޭހަ ރައްކާތެރި  މާހައުލެއް ޤާއިމްކޮށްދެއްވުމަށް އެ ގޯޅިތައް އަލިކުރުމަށް، ބައްތި ޖެހުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.

ސިޓީ ކައުންސިލުގެ ޚާއްސަ ޓީމެއް ނަގައިގެން ފައްޓަވައިފައިވާ މި މަސައްކަތް މުޅިން ނިންމާލެވޭ އިރު، މަގު ބައްތި ޖެހުމުގެ އިތުރުން އެ ގޯޅިތަކުގައި ހަލާކުވެފައިވާ ޕޭވްމަންޓުތައް ހަދައި މަގުގައި ގައުތައް އައުކޮށް މަރާމާތު ކުރުން ހިމެނެއެވެ. 

މާލޭގައި ދިރިއުޅުއްވާ ރައްޔިތުންނަށް ހިތްފަސޭހަ، އުފާވެރި ހިތްހަމަޖެހޭ މާޙައުލެއް ހޯއްދަވައި ދެއްވުމަށް ޓަކައި، މާލެ ސިޓީގެ މޭޔަރ އާދަމް ޢާޒިމްގެ ޚާއްޞަ އިސްނެންގެވުމުގެ މަތީން މީގެ ކުރިން ވެސް ވަނީ މި ފަދަ ބައެއް ކަންކަން ކުރައްވަފައެވެ. މި ގޮތުން ޕާކުތަކުގެ އާބާތުރަ ފިލުވައި މާލޭގެ މަގުތަކުން ކުނި ނަގައި، ވާރޭ ވެހި ފެން ހިދުމުން ވެސް ބައެއް މަގުތަކުގައި ފެން ނުހިދި އޮންނަ ސަރަޙައްދުތައް ރަނގަޅުކުރުން ހިމެނެއެވެ.

މީގެ އިތުރުން  މޭޔަރ ޢާޒިމް ވިދާޅުވީ ކައުންސިލްގެ އަމާޒަކީ މި ފަދަ ތުރާތަކުން މާލޭގެ ރަށްވެހިން ސަލާމަތްކޮށް ހިތް ފަސޭހަ ތަނަކަށް މާލެ ސިޓީ ހެދުމެވެ. މި ކަންކަން ޙާސިލް ކުރުމަށް ކައުންސިލްގެ އެންމެހައި މުވައްޒަފުން ގުޅިގެން، ހަލުވިދުވެލީގައި މަސައްކަތް ކުރުމަށް، އަމާޒު ހިފާފައިވާ ވާހަކަ ވެސް މޭޔަރ ޢާޒިމް ވިދާޅުވިއެވެ. 

ހަނި ގޯޅިތަކުގައި މަގު ބައްތި ޖަހައި އަލިކުރުމުގެ މަސައްކަތް ސިޓީ ކައުންސިލުން ފަށައިފި

ދުނިޔެ ބަވަނަ ވަމުންދިއުމުގެ ސަބަބުން، އިންސާނުން ވާހަކަ ދެއްކުމަށް ބޭނުންކުރާ ހުރިހައި ބަހަކަށް ކުރަމުންދާ އަސަރުތައް، ދިވެހި ބަހަށް ވެސް ކުރަމުންދާ ކަމާމެދު ސަމާލުވުމަށް މާލެ ސިޓީގެ މޭޔަރ އާދަމް ޢާޒިމް އިލްތިމާސް ކުރައްވައިފިއެވެ. 

މޭޔަރ ޢާޒިމް މި ފަދައިން އިލްތިމާސް ކުރައްވާފައިވަނީ ދިވެހި ބަހުގެ ދުވަހާގުޅިގެން އެކްސްގައި ކުރެއްވި ޓްވީޓެއްގައެވެ. 

މޭޔަރ ޢާޒިމް ވިދާޅުވީ، ދިވެހި ބަހަކީ، އެއްގޮތަށް ވުރެ ގިނަ ގޮތްގޮތުން، ދިވެހިން ފަޚުރުވެރިވާންވީ ކަންތައްތަކެއް އެކުލެވިފައިވާ ބަހެއް ކަމަށެވެ. އެ ގޮތުން ދިވެހި ބަސް ލިޔަން އަމިއްލަ އަކުރެއް ލިބިފައިވުމާއި ދިވެހި ބަހުގެ އަމިއްލަ އަޑުތަކެއް ހުރުމާއި ލިޔުމަށް ބޭނުންކުރާ އަކުރު މަދުވުމަކީ ވެސް ދިވެހި ބަހަށް ލިބިފައިވާ ޚާއްޞަ ސިފައެއް ކަމަށް ވެސް މޭޔަރ ޢާޒިމްގެ ޓްވީޓްގައި ފާހަގަކުރައްވާފައިވެއެވެ. 

މޭޔަރ ޢާޒިމް ވިދާޅުވީ، ދިވެހި ބަހުގައި ވަޒަން ބަހުރުވައިގެ، 8 ބާވަތެއް އެކުލެވިގެން ވުމަކީ ވެސް، ދިވެހި ބަހާމެދު ދިވެހިން ފަޚުރުވެރިވާންވީ މުހިއްމު ސަބަބެއް ކަމަށެވެ. 

ދިވެހި ބަހުގެ ދުވަހަކީ ކޮންމެ އަހަރެއްގެ އޭޕްރީލް މަހުގެ 14 ވަނަ ދުވަހެވެ. 

ބަވަނަ ވަމުންދާ ދިއުމުގައި ދިވެހި ބަހަށް ކުރަމުންދާ އަސަރުތަކާ މެދު ސަމާލުވުމަށް މޭޔަރ ޢާޒިމް އިލްތިމާސް ކުރައްވައިފި 

ޚާއްޞަ މަފްހޫމަކަށް ތަރައްޤީ ކުރުމަށް ނިންމާފައިވާ "ގަލޮޅު ސިޓީ ޕާރކް" ގެ ހާރޑް ސްކޭޕިންގ މަސައްކަތް ކުރުމަށް ބަޔަކާ ހަވާލުކޮށްފިއެވެ. 

މާލެ ސިޓީ ކައުންސިލުން މި މަސައްކަތް ކުރުމަށް ހަވާލުކޮށްފައި ވަނީ، ހައިމަން ކޮންސްޓްރަކްޝަން ޕްރައިވެޓް ލިމިޓެޑާއެވެ. މި މަސައްކަތުގެ ޖުމްލަ އަގަކީ، (ޖީ.އެސް.ޓީ އާއެކު) 1,828,491.84 (އެއް މިލިއަން އަށް ލައްކަ އަށާވީސް ހާސް ހަތަރު ސަތޭކަ ނުވަދިހަ އެއް ރުފިޔާ އަށްޑިހަ ހަތަރު ލާރި) އެވެ. 

ހައިމަން ކޮންސްޓްރަކްޝަން ޕްރައިވެޓް ލިމިޓެޑުގެ، އަމިއްލަ ތަކެތީގައި ކުރުމަށް ހަމަޖެހިފައިވާ

މުއްދަތަކީ، 2025 ވަނަ އަހަރު އެޕްރީލް މަހުގެ 11 ވަނަ ދުވަހުން ފެށިގެން 2025 ވަނަ އަހަރު މެއި މަހުގެ 10 ވަނަ ދުވަހުގެ ނިޔަލަށް (ބަންދު ދުވަސްތަކާއެކު) ޖުމްލަ 30 (ތިރީސް) ދުވަހަށެވެ. 

މި ޕާކުގެ މަސައްކަތް ނިމޭއިރު، ޕާކުގައި ދުވާ ޓްރެކަކާއި ބެންޑްމިންޓަން ކޯޓަކާއި ތްރީ އޮން ތްރީ ބާސްކެޓް ކޯޓަކާއި ކުޑަ ކުދިން ކުޅޭނެ ހުސް ސަރަހައްދަކާއި އައުޓްޑޯ ޖިމެއް ވެސް ޤާއިމް ކުރުމަށް ވަނީ ހަމަޖެހިފައެވެ.  

އެއްވެސް ބޭނުމެއް ނުހިފި، ވީރާނަވަމުން ދިޔަ، މި ޕާކުގައި އިވެންޓްތައް ބޭއްވުމަށް ޚާއްޞަ ކުރެވިފައިވާ ސަރަހައްދަކާއި އުމުރުން ދުވަސްމީ ބޭފުޅުން ހިތްހަމަ ޖައްސާލުމަށް މަޑުކޮށްލައިގެން ތިބުމަށް ތައްޔާރުކޮށްފައިވާ ސަރަހައްދެއް ތަރައްޤީ ކުރުމަށް ވަނީ ހަމަޖެހިފައެވެ.

ގަލޮޅު ސިޓީ ޕާރކްގެ ހާރޑް ސްކޭޕިންގ މަސައްކަތް ކުރުމަށް ބަޔަކާ ހަވާލުކޮށްފި

ހަނި ގޯޅިތަކުގައި ހުރި ގެތަކުގައި ދިރިއުޅުއްވާ ބޭފުޅުންނަށް ފަސޭހަ ކޮށްދެއްވުމަށް، އެ ގޯޅިތައް ތަރައްޤީ ކުރުމުގެ މަސައްކަތް، މާލެ ސިޓީ ކައުންސިލުން ކުރަމުން އަންނަ ކަމަށް، މޭޔަރ އާދަމް ޢާޒިމް ވިދާޅުވެއްޖެއެވެ. 

މޭޔަރ ޢާޒިމް މި ފަދައިން ވިދާޅުވީ، މާފަންނު ނަލަހިޔާ ކަންމަތީ ޕޭމަންޓު އުސްކުރުމަށް ކައުންސިލުން ކުރަމުން އަންނަ މަސައްކަތް ބައްލަވާލެއްވުމަށް ފަހު ދެއްވި އިންޓަވިއުގައެވެ. 

މޭޔަރ ޢާޒިމް ވިދާޅުވީ، މާލޭގެ ހަނި ގޯޅިތަކުގައި ހުރި ގެތަކުގައި ދިރިއުޅުއްވާ ބޭފުޅުންނާއި، އަދި ވެސް ގާ އަތުރައި ޕޭމެންޓް ހެދިފައިނުވާ ގޯޅި ތަކުގައި ހުރި ގެތަކުގައި ދިރިއުޅުއްވާ ފަރާތްތަކުން، އެ ގޯޅިތަކުގެ ޙާލަތު ކައުންސިލްގެ ސަމާލުކަމަށް ގެނެސްދިނުމުން، އެ ގޯޅި ތަރައްޤީ ކުރުމުގެ މަސައްކަތް ކައުންސިލުން ކޮށްދެއްވާނެކަމަށެވެ. އަދި މި ކަމުގައި ވެސް ރައްޔިތުންގެ ފަރާތުން، މިހާރު ވެސް ލިބެމުންދާ ފުރިހަމަ އެއްބާރުލެއްވުމަށް ޝުކުރު އަދާ ކުރައްވާ ކަމަށް ވެސް މޭޔަރ ޢާޒިމް ވިދާޅުވިއެވެ. 

މޭޔަރ ޢާޒިމް ވިދާޅުވީ، މާލޭގެ ބައެއް ގޯޅިތައް ހަލާކުވުމުން ވެސް މަރާމާތު ނުކޮށް އޮންނަތާ ގިނަ އަހަރުތަކެއް ވެފައިވުމުން، އެ ގޯޅި ތަކުގައި ދިރި އުޅުއްވާ ބޭފުޅުންނަށް ގިނަ އުނދަގޫތަކާ ކުރިމަތިލާން ޖެހިފައިވާ ކަމަށެވެ.

"ހަނި ގޯޅިތަކުގައި ރަނގަޅަށް ގާ އެތުރިފައިނުވާކަމާއި ހަނިގޯޅިތަކުގައި ބުޅަލުގެ ނަޖިސް ހުންނަ ކަމުގެ ޝަކުވާ ވެސް ރައްޔިތުންގެ ފަރާތުން ލިބޭ. އަދި އެ ގޯޅިތަކުގައި އަޑިގުޑަންތައް ހުރުމުގެ ސަބަބުން ހިނގާ ބިނގާވެ އުޅުއްވާ ބޭފުޅުންނަށް އަނިޔާވެ، ގެއްލުންތައް ލިބޭ. އެ ކަންކަން ވެސް ބަޔާންކޮށް، މި ފަދަ ދަތިތަކާބެހޭ މަޢުލޫމާތު ހިމެނޭ ސިޓީއެއް ކައުންސިލަށް ފޮނުއްވައިދެއްވުން އެދެން. ތިޔަ ބޭފުޅުންގެ ފަރާތުން މި ފަދަ މަޢުލޫމާތު ލިބިއްޖެނަމަ، އެ މަގުތަކުގެ ޙާލަތު ރަނގަޅުކޮށް، ތިޔަ ބޭފުޅުންނަށް މިހާރު ދިމާވާދަތިތައް ޙައްލު ކުރުމުގެ މަސައްކަތްކުރާނެ ވާހަކަ ދަންނަވަން.'' މޭޔަރ ޢާޒިމް ވިދާޅުވިއެވެ. 

މޭޔަރ ޢާޒިމް ވިދާޅުވީ ކައުންސިލްގެ އަމާޒަކީ މި ފަދަ ތުރާތަކުން ރައްޔިތުން ސަލާމަތްކޮށް ހިތް ފަސޭހަ މާހައުލަކަށް މާލެ ސިޓީ ހެދުމެވެ. މި ކަންކަން ޙާޞިލް ކުރުމަށް ކައުންސިލްގެ އެންމެހައި މުވައްޒަފުން ގުޅިގެން، ހަލުވިދުވެލީގައި މަސައްކަތް ކުރުމަށް، އަމާޒު ހިފާފައިވާ ވާހަކަ ވެސް މޭޔަރ ޢާޒިމް ވިދާޅުވިއެވެ. 

މާލޭގެ ރައްޔިތުންނަށް ހިތްފަސޭހަ މާޙައުލެއް ޤާއިމް ކުރުމުގެ މަސައްކަތް ހަނި ގޯޅިތަކާ ހަމައަށް

މި ވަގުތު އެންމެ ބޮޑަށް ސަމާލުކަން ދީގެން ކުރަމުން އަންނަ އެއް މަސައްކަތަކީ، މާލެ ސިޓީގެ މަގުތަކުގައި ހުރި ކާނުތައް ސާފުކުރުން ކަމަށާއި އެ ގޮތުގެ މަތިން މި އަހަރު ނިމުމުގެކުރިން ހުރިހައި ކާނުތައް ސާފުކޮށް ނިންމާނެ ކަމަށް މޭޔަރ އާދަމް ޢާޒިމް ވިދާޅުވެއްޖެއެވެ. 

މޭޔަރ ޢާޒިމް މި ފަދައިން ވިދާޅުވީ، މާފަންނު ނަލަހިޔާ ކަންމަތީ ޕޭމަންޓު އުސްކުރުމަށް، ކައުންސިލުން ކުރަމުން އަންނަ މަސައްކަތް ބައްލަވާލެއްވުމަށް ފަހު ދެއްވި އިންޓަވިއުގައެވެ. 

މޭޔަރ ޢާޒިމް ވިދާޅުވީ، މާލެ ސިޓީ ކައުންސިލުން އެންމެ ބޮޑަށް ސަމާލުކަން ދީގެން މި ވަގުތު ކުރަމުން އަންނަ މަސައްކަތަކީ ރައްޔިތުންނަށް ދަތިވާ ކަންކަންކަން ހައްލުކުރުން ކަމަށާއި އެ ގޮތުން މާލޭގެ މޭޔަރުކަމާ ހަވާލުވިއިރު، މާލޭގެ ކާނުތައް ވަނީ އެއްގޮތަކަށް ވެސް ސާފު ނުކުރާތާ 15 ވަރަކަށް އަހަރު ވެފައި ކަމަށެވެ. އެހެން ކަމުން، ވަކި ޕްރޮޖެކްޓެއްގެ ގޮތުގައި ކާނު ސާފު ކުރުމުގެ މަސައްކަތް ބާރު ސްޕީޑުގައި ކުރަމުން އަންނަ ކަމަށާއި އެ ގޮތުން މި އަހަރު ނިމުމުގެކުރިން، މާލޭގެ ހުރިހާ ކާނުތަކެއް ސާފުކޮށް ނިންމާނެ ކަމަށް، މޭޔަރ ޢާޒިމް ވިދާޅުވިއެވެ. 

މީގެ އިތުރުން، މޭޔަރ ޢާޒިމް ވިދާޅުވީ، ވާރޭ ވެހި މަގުތަކުން ފެން ހިދޭއިރު ވެސް، މާލޭގެ މަޖީދީ މަގުގައި ފެން ހަރުލާފައި ހުންނަ ހަތަރު ސަރަހައްދެއް، ކައުންސިލަށް ފާހަގަ ކުރެވި، އެ ސަރަހައްދުތަކުގެ ކާނުތައް މިހާރު ސާފުކޮށް ނިންމާލާފައިވާ ކަމަށެވެ. އަދި ސްކޫލް ތަކުގެ ދަރިވަރުންނަށް ދަތިވާގޮތަށް ފެން ހަރުލާފައި ހުންނަ، ޗާދަނީ މަގުގެ ކުރީގެ އަރަބިއްޔާ ސްކޫލް ކާރި ކާނުތައް ވެސް، މިހާރު ސާފުކޮށް ނިންމާފައިވާ ކަމަށް މޭޔަރ ޢާޒިމް ވިދާޅުވިއެވެ. 

ޢާޒިމް ވިދާޅުވީ، ގަޑި ބުރު ސަރަހައްދާއި ލަގްޒަރީ ސަރަހައްދު އަދި ސަންޕޮރަންޓު ސަރަހައްދުގެ ކާނުތައް ސާފުކުރުމުގެ މަސައްކަތް ކައުންސިލްގެ ޓީމުތަކުން މިހާރު ފަށައިގެން ކުރަމުން ގެންދާ ކަމަށެވެ. އަދި މި މަސައްކަތްތައް ދެ ތިން ދުވަހެއްގެ ތެރޭގައި ނިންމާލާނެ ކަމަށް ވެސް، ޢާޒިމް ވިދާޅުވިއެވެ. 

މޭޔަރ ޢާޒިމް ވިދާޅުވީ، މި މަސައްކަތްތައް ކުރަމުން މި އަންނަނީ، ކައުންސިލްގެ ވަރަށް ހީވާގި މުވައްޒފުންގެ މިންނެތް މަސައްކަތުން ކަމަށާއި އެ ކަމަށް ޓަކައި އެ ހުރިހާ މުވައްޒަފުންނަށް ޝުކުރުދަންނަވާކަމަށެވެ. 

މި އަހަރު ނިމުމުގެކުރިން މާލޭގެ ހުރިހާ ކާނުތަކެއް ސާފުކޮށް ނިންމާނަން: މޭޔަރ ޢާޒިމް 

ކެނެޑާ ސަރުކާރުން ރާއްޖެއަށް ކަނޑައަޅުއްވާފައި ހުންނަވާ ސަފީރު އެރިކް ވޮލްޝް، މާލެ ސިޓީގެ މޭޔަރ އާދަމް ޢާޒިމާ  ބައްދަލުކުރައްވައިފިއެވެ. މި ބައްދަލުކުރެއްވުން އޮތީ، ހޯމަ ދުވަހު މާލެ ސިޓީ ކައުންސިލް އިދާރާގައެވެ. 

މި ބައްދަލުވުމުގައި ވާހަކަފުޅު ދައްކަވަމުން، މޭޔަރ ޢާޒިމް ވިދާޅުވީ، މާލެ ސިޓީގެ މޭޔަރު ކަމުގެ މަޤާމާ އެ މަނިކުފާނު ހަވާލުވެވަޑައިގެން މިވީ މަދު ދުވަސް ކޮޅުގެ ތެރޭ، މާލެ ސިޓީގެ ކަންކަން ރަނގަޅުކުރުމަށް ޓަކައި ގިނަގުނަ މަސައްކަތްތަކެއް ކުރައްވާފައިވާ ކަމަށާއި ކުރިޔަށް އޮތް ދުވަސްތަކުގައި ވެސް، އިތުރު މަސައްކަތް ކުރުމަށް ޕްލޭން ކުރެވިފައިވާ ކަމަށެވެ. އެ ގޮތުން ކުރަން ރާވާފައިވާ ކަންކަމުގެ ތެރޭގައި، މާލެ ސިޓީގެ މަގުތައް މަރާމާތު ކުރުން އިސްކަމެއްގެ ގޮތުގައި ކުރަން ނިންމާފައިވާކަން މޭޔަރ ފާހަގަކުރެއްވިއެވެ.

ދިވެހިރާއްޖެއާއި ކެނެޑާއާ ދެމެދު އުފެދިފައިވާ، ޒަމާންވީ ގާތް ރަހުމަތްތެރި ގުޅުމުގެ މައްޗަށް އަލިއަޅުވައިލައްވައި މޭޔަރ ޢާޒިމް ވިދާޅުވީ، މި ދެ ޤައުމުގެ ދެމެދުގައި އޮތް ޒަމާންވީ ގުޅުމުގެ ސަބަބުން، ދެ ޤައުމަށް ގިނަ ގުނަ ފައިދާތަކެއް ކުރާނެކަމަށެވެ. 

މި ބައްދަލުވުމުގައި ވާހަކަފުޅު ދައްކަވަމުން ކެނެޑާގެ ސަފީރު ވިދާޅުވީ، މާލެ ސިޓީ ކައުންސިލާއެކު މިހާރު އޮތް ގުޅުން، ކުރިއަށް އޮތް ދުވަސް ތަކުގައި އިތުރަށް ބަދަހިކުރައްވާނެކަމަށާއި ކައުންސިލުން ކުރިއަށްގެންދާ އެކިއެކި މަސައްކަތްތަކަށް ދެވެންއޮތް އެއްބާރުލުން ދެއްވާނެކަމަށެވެ. 

މި ބައްދަލުވުމުގައި މޭޔަރ ޢާޒިމްގެ އިތުރުން، ޑެޕިއުޓީ މޭޔަރ މުޙައްމަދު އަރީޝް ވެސް ބައިވެރިވެވަޑައިގެންނެވިއެވެ. 

ކެނެޑާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މޭޔަރ ޢާޒިމާ ބައްދަލުކުރައްވައިފި

ދީނީ ކަންކަމަށް ސަމާލުކަންދީ، ރިވެތި އަޚުލާޤުން ޖަރީވުމަށް، ލޮބުވެތި ދަރިވަރުންނަށް، މާލެ ސިޓީގެ މޭޔަރ އާދަމް ޢާޒިމް  އިލްތިމާސްކުރައްވައިފި އެވެ. 

މޭޔަރ ޢާޒިމް ދަރިވަރުންނަށް މި ފަދައިން އިލްތިމާސްކުރައްވާފައި ވަނީ، ދިގު ޗުއްޓީއަކަށް ފަހު މި އަދު މި ފެށުނު ދިރާސީ އާ އަހަރުގެ ކިޔެވުން ފެށުމުން އެ މަނިކުފާނުގެ އަމިއްލަފުޅު ސޯޝަލް މީޑީއާގެ ޕްލެޓްފޯމްތަކުގައި ކުރެއްވި ޕޯސްޓުގައެވެ. 

މޭޔަރ ޢާޒިމް ވިދާޅުވީ، އުނގަންނައިދޭ ޢިލްމާއި އެއްވަރަށް، ދަރިވަރުންގެ ކިބައިގައި، ރިވެތި އަޚުލާޤު އަށަގަންނުވައި، ޤައުމަށް ބޭނުންހިފޭ، މުޖުތަމަޢުގެ އަގުތަކަށް އިޙުތިރާމް ކުރާ، މުޖުތަމަޢު ބަލައިގަންނަ ފަދަ ގޮތަކަށް، ދަރިވަރުން ތައްރުބިއްޔަތުކޮށް ދެއްވެމަށް، ތަރުބިއްޔަތުކުރުމުގެ ޒިއްމާ އުފުއްލަވަމުންގެންދަވާ ހުރިހާ ފަރާތްތަކުގެ އަރިހުން އެދޭ ކަމަށެވެ. އަދި މި ފެށުނު ތަޢުލީމީ އާ އަހަރު، ޢިލްމާއި ފަންނާއި ހުނަރުން، ނަފުސު ޒީނަތްތެރި ކުރުމުގެ އިތުރުން، ދީނީ ކަންކަމަށް ސަމާލުކަންދީ، ރިވެތި އަޚުލާޤުން ޖަރީވުމަށް، ލޮބުވެތި ދަރިވަރުންނަށް އިލްތިމާސްކުރައްވާ ކަމަށް ވެސް، މޭޔަރ ޢާޒިމް ވިދާޅުވި އެވެ. 

"މި ފެށުނު ދިރާސީ އަހަރަކީ ހުރިހާ ގޮތަކުން ކާމިޔާބު ދިރާސީ އަހަރަކަށް ވުމަށްއެދި ދުޢާކުރަން. ދިރާސީ އާ އަހަރު ފެށުމުގެ މުނާސަބަތުގައި، ދިވެހި ރާއްޖޭގެ ލޮބުވެތި ކިޔަވާކުދިންނާއި، އުނގަންނައި ދެއްވުމުގެ ބުރަ މަސްއޫލިއްޔަތު އަދާކުރައްވާ ހުރިހާ ޚިދުމަތްތެރިންނަށް، އަޅުގަނޑުގެ ހިތުގެ ފުންމިނުން މަރުޙަބާ ދަންނަވަން." މޭޔަރ ޢާޒިމްގެ ސޯޝަލް މީޑީއާގައި ކުރެއްވި ޕޯސްޓުގައި ވިދާޅުވެފައިވެއެވެ. 

މީގެ އިތުރުން މޭޔަރ ޢާޒިމް މި އަދު ވަނީ، މާލެ ސިޓީ ކައުންސިލްގެ ބެލުމުގެ ދަށުގައިވާ މާފަންނު މަދަރުސާއަށް ވަޑައިގެން ހެނދުނު ދަންފަޅީގެ އެސެމްބްލީގައި ބައިވެރިވެވަޑައިގެން، ދަރިވަރުންނާ މުޚާތަބުކުރައްވައި ވާހަކަ ފުޅުދައްކަވާފައެވެ. އަދި އެސެމްބްލީއަށް ފަހު ދަރިވަރުންނާއި ޓީޗަރުންނާއެކު މޭޔަރ ޢާޒިމް ގްރޫޕް ފޮޓޯއެއް ވެސް ނެންގެވިއެވެ. 

ދީނީ ކަންކަމަށް ސަމާލުކަންދީ ރިވެތި އަޚުލާޤުން ޖަރީވުމަށް މޭޔަރ ޢާޒިމް ދަރިވަރުންނަށް އިލްތިމާސްކުރައްވައިފި

ޢީދުގެ އުފާ ކުރުމާއި ޢީދުގެ އުފާ ލިބިގަތުމުގައި، އާއިލީ ގުޅުމާއި އަވަށްޓެރިކަމުގެ ގުޅުން ބަދަހިކުރުމަށް، މާލެ ސިޓީގެ މޭޔަރ އާދަމް ޢާޒިމް އެދިވަޑައިގެންފިއެވެ. 

މޭޔަރ ޢާޒިމް މި ކަމަށް އެދިވަޑައިގެންނެވީ، 1446 ވަނަ އަހަރުގެ ފިޠުރު ޢީދު ދުވަހާ ގުޅިގެން، އެ މަނިކުފާނުގެ އަމިއްލަފުޅު ސޯސަލް މީޑިއާ އެކައުންޓްތައް މެދުވެރިކޮށް ޕޯސްޓްކުރެއްވި ވީޑިއޯ މެސެޖުގައެވެ.

މޭޔަރ ޢާޒިމްގެ ވީޑިއޯ މެސެޖުގައި ވިދާޅުވެފައި ވަނީ، ބަރަކާތްތެރި ރަމަޟާން މަސް ނިމުމާއެކު އަޅުގަނޑުމެންނާ މި ބައްދަލުކުރާ ފިތުރު ޢީދަކީ، އެންމެންގެ ގުޅުން ބަދަހިކުރުމަށް ލިބޭ ވަރަށް ރަނގަޅު ފުރުޞަތެއް ކަމަށެވެ. އަދި  މި ފުރުޞަތުގެ ބޭނުން ހިފައި، އާއިލީ ގުޅުމާއި އަވަށްޓެރިކަމުގެ ގުޅުން ބަދަހިކޮށް، ހުރިހައި  މުސްލިމް އަޚުންނާއި އުޚުތުންގެ، ގުޅުން ބަދަހި ވެގެން ދިއުމަކީ ވަރަށް ބޮޑަށް އެދިވަޑައިގަންނަވާ ކަމެއް ކަމަށް ވެސް މޭޔަރ ޢާޒިމްގެ މެސެޖުގައި ވިދާޅުވެފައިވެއެވެ. 

މީގެ އިތުރުން މޭޔަރ ޢާޒިމްގެ ވީޑިއޯ މެސެޖުގައި، ފިތުރު ޢީދުގެ އުފާވެރި މުނާސަބަތުގައި ދިވެހިރާއްޖޭގެ ލޮބުވެތި އެންމެހައި ރަށްޔިތުންނަށް ވަރަށް އިޚުލާސްތެރިކަމާއެކު ތަހުނިޔާ ދަންނަވައި ހޮޔޮއެދުންތައް އަރިސްކުރައްވާފައިވެއެވެ. 

Latest news

Latest news