މާލެ ސިޓީއަކީ އަމާން، ހިތް ފަސޭހަ ސިޓީއަކަށް ހެދުމަށް، މޭޔަރ އާދަމް ޢާޒިމް ކަނޑައަޅުއްވާފައިވާ ތަޞައްވުރުގެ ދަށުން، މާފަންނުގައި ތަރައްޤީ ކުރަމުން އަންނަ "މާފަންނު މައިޒާން" ގެ ވަށައިގެން، ޕާކިން ޒޯންތައް ތަރައްޤީ ކުރުމުގެ ޢަމަލީ މަސައްކަތް ފަށައިފިއެވެ. 

މާފަންނުގެ ރައްޔިތުންނަށް، ފަސޭހައާއި އުފަލާއި ހިތްހަމަޖެހުން ގެނައުމުގެ މަޤުޞަދުގައި ކުރަމުންދާ މި މަސައްކަތުގެ ދަށުން، މާފަންނު މައިޒާނުގައި ބަސް ސްޓޭންޑެއް ތަރައްޤީ ކުރުމާއި 295 ސައިކަލު ޕާކް ކުރެވޭނެ ޕާކިން ޒޯނެއް ތަރައްޤީކުރުން ހިމެނެއެވެ. އަދި މި މައިޒާނުގައި ގްރީން އޭރިއާއަކާއި، ކަސްރަތު ކުރުމަށް ކަނޑައެޅިފައިވާ 496 އަކަ ފޫޓް ސަރަހައްދެއް ތަރައްޤީ ކުރުމަށް ވެސްވަނީ ހަމަޖެހިފައެވެ. 

މާލޭގައި، ވެހިކަލް ޕާކުކުރާނެ ސަރަހައްދުތަކާއި، ޕާކިން ޖާގަ އިތުރު ކުރުމަކީ، އެ މަނިކުފާނުގެ ވަޢުދުފުޅުތައް ފުއްދަވައި ޢަމަލީ ގޮތުން ނަތީޖާ ނެރެދެއްވަމުންގެންދަވާ، މާލެ ސިޓީގެ މިހާރުގެ މޭޔަރ އާދަމް ޢާޒިމްގެ މުހިއްމު ވަޢުދުފުޅެކެވެ. އެ ވަޢުދުފުޅު ފުއްދެވުމަށް، މިހާރު ވެސް މާލެ ސިޓީ ކައުންސިލުން އަންނަނީ، މާލޭގެ އެކި ސަރަހައްދުތަކުގައި ޕާކިންގް ޒޯންތައް ތަރައްޤީކޮށް، އެކަމުގެ ފަސޭހަތައް ރައްޔިތުންނަށް ފޯރުކޮށްދެމުންނެވެ. 

މޭޔަރ އާދަމް ޢާޒިމް ވިދާޅުވީ، މި މަޝްރޫޢުގެ ސަބަބުން މާފަނުގައި ދިރިއުޅޭ ރައްޔިތުންގެ އާންމު ދިރިއުޅުމުގެ ވަރަށް ގިނަ ކަންކަމަށް، ފަސޭހަތަކެއް ލިބިގެންދާނެ ކަމަށް ޔަގީން ކުރައްވާ ކަމަށެވެ. 

ޖުމްލަ 36،153.00 އަކަފޫޓް ހުންނަ މި މައިޒާން، ފެހި، ހިތްގައިމު، އަދި ތިމާވެށްޓާ ރައްޓެހި މައިޒާނަކަށް ހެދުމަށް ޓަކައި ދާދި ފަހުން ވަނީ، މި މައިޒާނުގައި ގަސް އިންދުމުގެ ޚާއްޞަ ހަރަކާތެއް ވެސް ކުރިއަށް ގެންގޮސްފައެވެ.  މި ގޮތުން މި މައިޒާނުގައި އިންދާފައި ވަނީ، ހިޔާދޭ ބޮޑެތި ގަސްތަކާއި ބަގީޗާ ގަސްތަކާއި މާ ގަސްތަކާއި މޭވާއާއި ތަކުރާރީ ގަސްތަކެވެ.  

މާލެ ސިޓީގެ، ހިންގުންތެރި މޭޔަރުގެ ސީދާ ބެއްލެވުމުގެ ދަށުން، ކައުންސިލުން ތަރައްޤީކުރާ  މާފަންނު މައިޒާން ތަރައްޤީ ކުރަނީ، އެ ތަން ބޭނުންކުރާ ފަރާތްތަކުގެ ހިތްހަމަޖެހުމަށް ވަރަށް ބޮޑަށް އިސްކަންދީގެންނެވެ. މި ގޮތުން މި މަސައްކަތް ނިމޭއިރު، އެ ސަރަޙައްދުގައި ފެން ހިންދާ ނިޒާމެއް ވެސް ޤާއިމްކުރުމަށް ވަނީ ނިންމާފައެވެ. 

-