މާލެ ސިޓީ ކައުންސިލުން ސެރެޓް ސްޓޫޑިއޯ އާ ހަވާލުކޮށްގެން ކުރިއަށްގެންދާ "ރީތިންކް މާލެ ސިޓީ" (Rethink Malé City) މަޝްރޫއުގެ ދަށުން، މާލޭގެ ތަރައްޤީގެ ޕްލޭން އެކުލަވާލުމުގެ މަސައްކަތް ބާރުދުވެލީގައި ކުރިއަށްދާކަން 4 މާރޗް 2026 ގައި ބޭއްވި މާލެ ސިޓީ ކައުންސިލުގެ 4 ވަނަ ދައުރުގެ 236 ވަނަ ރަސްމީ އާންމު ޖަލްސާގައި ވަނީ ހާމަކޮށްފައެވެ. 

މި މަސައްކަތަކީ ދުނިޔޭގެ ނިސްބަތުން އެންމެ ތޮއްޖެހިފައިވާ އަދި ތިމާވެށީގެ ގޮންޖެހުންތައް ބޮޑު އެއް ސިޓީގެ ގޮތުގައި އޮތް މާލެއަށް ދިމާވެފައިވާ ގޮންޖެހުންތަކަށް ހައްލު ހޯދުމަށް ފަރުމާކުރެވިފައިވާ މަސައްކަތެކެވެ. މި އިސްތިރާޖީ ޕްލޭން ބިނާވެފައިވަނީ ތިމާވެށި، އިގްތިސާދު އަދި އިޖުތިމާއީ ދާއިރާއާ ގުޅޭ 7 މުހިންމު ކަމެއްގެ މައްޗަށެވެ. 

އެގޮތުން އެކަންކަމަކީ:

1.	ދުވެލި ހަލުވި ސިޓީއެއް (A City That Moves): އަމިއްލަ އުޅަނދުތަކަށް ބަރާސާވުން ކުޑަކޮށް، އާންމު ދަތުރުފަތުރާއި ހިނގާފައި އުޅޭ މީހުންނަށް އިސްކަންދިނުން.

2.	ހިތްފަސޭހަ ފެހި ސިޓީއެއް (A City That Is Cool): ގަސް އިންދުން އިތުރުކޮށް، ފެންބޮޑުވުމުގެ މައްސަލައަށް ހައްލު ހޯދައި، ހޫނުމިން ކުޑަކުރުން.

3.	ބަދަލުތަކަށް އިޖާބަދޭ ސިޓީއެއް (A City That Is Adaptable): މީހުން ދިރިއުޅޭ ސަރަހައްދުތަކާ ނުގުޅޭ ސިނާއީ މަސައްކަތްތައް އެހެން ތަންތަނަށް ބަދަލުކުރުން.

4.	ފާގަތި ސިޓީއެއް (A City That Thrives): އިގްތިސާދީ ހާއްސަ ޒޯންތަކާއި ވަޒީފާގެ ފުރުސަތުތައް އިތުރުވާނެ ފަދަ ސަރަހައްދުތައް ކަނޑައެޅުން.

5.	އެންމެންގެ ސިޓީއެއް (A City For Everyone): ހުރިހާ ފަންތިއެއްގެ ރައްޔިތުންނަށް އެކަށީގެންވާ ބޯހިޔާވަހިކަމާއި އިޖުތިމާއީ މައިދާންތައް ފަސޭހައިން ލިބޭނެ މަގު ފަހިކުރުން

6.	އަމިއްލަވަންތަކަން ހުރި ސިޓީއެއް (A City With Character): މާލޭގެ ބިނާތަކާއި އާސާރީ ތަންތަން ރައްކާތެރިކޮށް، ސަގާފީ މުއްސަނދިކަން އަންނަން އޮތް ޖީލުތަކަށް ފޯރުކޮށްދިނުން.

7.	ރައްކާތެރި ސިޓީއެއް (A City That Is Safe): އުމުރުން ދުވަސްވީ މީހުންނަށް ފަސޭހަ އަދި އިޖުތިމާއީ ރައްކާތެރިކަން ކަށަވަރުވެފައިވާ މާލެއެއް ބިނާކުރުން.

މީގެ އިތުރުން މި އިސްތިރާޖީ ޕްލޭން އެކުލަވާލުމުގައި ރައްޔިތުންގެ ހިޔާލު ހޯދުމަށް ވަނީ ބޮޑު އިސްކަމެއް ދީފައެވެ. 

އެގޮތުން އެކަންކަމުގެ ތެރޭގައި ހިމެނެނީ: 

•	އޮކްޓޫބަރު 2025 ގައި ބޭއްވުނު ފުރަތަމަ ސެޝަނުގައި 78 ބައިވެރިން ބައިވެރިވިއެވެ.

•	ޑިސެމްބަރު މަހު ބޭއްވުނު ވޯޓިންގް ސެޝަނުގައި 61 ފަރާތަކުން ހިޔާލު ދީފައިވެއެވެ.

•	އޮންލައިންކޮށް ކުރިއަށްގެންދިޔަ ސާވޭއަށް ގިނަ އަދަދެއްގެ ރައްޔިތުންގެ އިޖާބަ ލިބިފައިވެއެވެ.

މި ސާވޭތަކުން ދައްކާގޮތުގައި، ރައްޔިތުން އެންމެ ބޮޑަށް އެދެނީ މަގުތަކުގެ ރައްކާތެރިކަން ކަށަވަރުކުރުމަށާއި، ހިތްފަސޭހަ ފެހި މައިދާންތައް އިތުރުކުރުމަށެވެ.

މިކަމާ ގުޅޭގޮތުން މޭޔަރ އާދަމް ޢާޒިމް ވިދާޅުވީ، މިއީ ހަމައެކަނި ކައުންސިލުން އެކުލަވާލާ ޕްލޭނެއް ނޫން ކަމަށާއި، މިއީ މާލޭގެ ހުރިހާ ރައްޔިތުންގެ މުސްތަގުބަލާ ގުޅިފައިވާ މުހިންމު މަސައްކަތެއް ކަމަށެވެ. 125،000 އަށްވުރެ ގިނަ އުޅަނދު ދުއްވާ މި ކުޑަ ސިޓީއަށް ހުށަހެޅިފައިވާ އިސްލާހުތަކަކީ މިހާރުން މިހާރަށް ބޭނުންތެރި ކަންތައްތަކެއް ކަމަށް މޭޔަރު ފާހަގަކުރެއްވިއެވެ. އަދި މި މަސައްކަތް ކާމިޔާބުކުރުމުގައި އާންމު ރައްޔިތުންނާއި އަމިއްލަ މުއައްސަސާތަކުގެ އެއްބާރުލުން ނުހަނު ބޭނުންވާނެ ކަމަށް ވެސް އެމަނިކުފާނު ވިދާޅުވިއެވެ.

ކުރިއަށް އޮތް ތަނުގައި، އިސްލާހުކުރެވޭ ލޭންޑް ޔޫސް ޕްލޭނާ ގުޅޭގޮތުން ރައްޔިތުންގެ ހިޔާލު ހޯދުމަށް އިތުރު ބައްދަލުވުންތަކެއް ބޭއްވުމަށް ވަނީ ތާވަލުކުރެވިފައެވެ.

މާލޭގެ "އާބަން ސްޓްރެޓެޖީ 2030-2050" އާ ގުޅޭ އިތުރު ތަފްސީލާއި، ލޭންޑް ޔޫސް ޕްލޭންގެ ޗާޓުތައް ބަލާލުމަށް މާލެ ސިޓީ ކައުންސިލްގެ ރަސްމީ ވެބްސައިޓަށް ޒިޔާރަތްކުރެއްވުމަށް ކައުންސިލުން އިލްތިމާސްކުރެއެވެ. އަދި އިންޓަރެކްޓިވް 

 މެދުވެރިކޮށް މި ޕްލޭން ބަލައި، ހިޔާލު ހުށަހެޅުމުގެ ފުރުސަތުވެސް ވަނީ ހުޅުވާލެވިފައެވެ.