ސްކޫލް ބަންދާ ދިމާކޮށް މާލެއިން ބޭރަށް ނުވަތަ ރަށުން ބޭރަށް ދަތުރުކުރާ ފަރާތްތަކުން، ތިމާ ދިރިއުޅޭ ގޭބިސީގެ ރައްކާތެރިކަން ކަށަވަރުކުރުމަށް މާލެ ސިޓީގެ މޭޔަރ އާދަމް ޢާޒިމް އިލްތިމާސްކޮށްފިއެވެ.

މޭޔަރ ޢާޒިމް ވިދާޅުވީ ޗުއްޓީއަށް ދިއުމަށް ރަށުން ބޭރަށް ފުރަންދާން ގެއިން ނުކުތުމުގެ ކުރިން ގެދޮރު ރަނގަޅަށް ތަޅުލެވުނުތޯއާއި ފެންލައިޓް، ވައިގޮޅި، ގޭގެ ކުޑަދޮރުތައް އަދި ބެލްކަނި ދޮރުވެސް ތަޅުލެވުނުތޯ ޔަގީންކުރުމަށާއި  ދުވާލަކު އެއްފަހަރު ނަމަވެސް ގެދޮރު ބެލޭނެ އިންތިޒާމު ހަމަޖައްސާފައި ދިއުމަށެވެ. 

"ގޭގައި އަލިކަން ބެހެއްޓުމުގެ ގޮތުން ރޭގަނޑުގެ ވަގުތުގައި ގެ ދިއްލައި، ބެލެހެއްޓޭނެ އިންތިޒާމު ހަމަޖެއްސުމަށް ޒިންމާދާރު ކޮންމެވެސް މީހަކާ ހަވާލުކުރުން މުހިންމު" މޭޔަރ ޢާޒިމް ވިދާޅުވި އެވެ. 

މީގެ އިތުރުން ކަމާބެހޭ ފަރާތްތަކުން ވެސް ވަނީ މިކަމަށް ވަރަށް ބޮޑަށް އިލްތިމާސްކުރައްވާފައެވެ. 

މިގޮތުން ސަމާލުކަން ދޭންޖެހޭ މުހިންމު ކަންތައްތަކުގެ ތެރޭގައި ހިމެނެނީ:

*ދޮރުތައް ތަޅުލުން: ގެއިން ބޭރަށްދާއިރު ހުރިހާ ދޮރުތަކާއި ކުޑަދޮރުތައް ރަނގަޅަށް ތަޅުލެވިފައިވޭތޯ ޗެކްކުރުން.

*ކަރަންޓު ސާމާނު: ބޭނުންނުކުރާ ކަރަންޓު ސާމާނުތައް ނިއްވާލުމާއި، ސްވިޗްތައް އޮފްކުރުން.

*މީހަކާ ހަވާލުކުރުން: ގޭގެ ކަންތައްތައް ބަލައިދިނުމަށް އިތުބާރުހުރި އަވަށްޓެރިއެއް ނުވަތަ ތިމާގެ މީހަކަށް ދަންނަވާލުން.

މިއީ ވައްކަމާއި އަދި އަލިފާނުގެ ހާދިސާތަކުން ރައްކާތެރިވުމަށް އެޅިދާނެ މުހިންމު ފިޔަވަޅުތަކެކެވެ. އެންމެހާ ފަރާތްތަކަށް އަމާން އަދި އުފާވެރި ޗުއްޓީއަކަށް އެދެމެވެ

ސްކޫލް ބަންދަށް ރަށުން ބޭރަށް ފުރާއިރު ގޭގެ ރައްކާތެރިކަމަށް ސަމާލުވުމަށް މޭޔަރ އާދަމް ޢާޒިމް އިލްތިމާސްކޮށްފި

ދިވެހިންނަކީ އަބަދުވެސް އެއްބައިވަންތަކަމުގެ ޗޭނަކުން ގުޅިފައިވާ ބައެއް ކަމަށް މާލެ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ. 

މޭޔަރ ޢާޒިމް މިފަދައިން ވިދާޅުވީ، 2004 ވަނަ އަހަރު ކުރިމަތިވި ސުނާމީ ކާރިސާއާ ގުޅިގެން ދިވެހިންގެ ފަރާތުން ފެނިގެންދިޔަ އެއްބައިވަންތަކުގެ ރީތި މިސާލުތަކަށް ނިސްބަތްކޮށް، ކޮންމެ އަހަރެއްގެ ޑިސެމްބަރ މަހުގެ 26 ވަނަ ދުވަހު ފާހަގަކުރާ އެއްބައިވަންތަކަމުގެ ދުވަހާ ގުޅިގެން، އެމަނިކުފާނުގެ އަމިއްލަފުޅު ސޯޝަލް މީޑިއާގައި ކުރެއްވި ޕޯސްޓެއްގައެވެ. 

އެއްބައިވަންތަކަމުގެ ދުވަހަކީ ގިނަ ހަނދާންތަކެއް އާކޮށްދޭ އަދި  ޢިބްރަތްތެރި ފިލާވަޅުތަކެއް ލިއްބައިދޭ ދުވަހެއް ކަމަށް ސިފަ ކުރައްވައި މޭޔަރ ޢާޒިމް ވިދާޅުވީ، ދިވެހިންނަކީ ހުރިހައި ޙާލަތެއްގައި ވެސް އެކަކު އަނެކަކަށް ޓަކައި ތިބޭ ބައެއްކަން މި ދުވަހުން އެނގިގެން ދިޔަ ކަމަށެވެ. އަދި އެކެއްގެ އިޙުސާސްތަކާއި އުދާސްތައް އަނެކަކަށް އެނގޭކަން ހާމަވެގެން ދިޔަ ކަމަށާއި އެއްބައިވަންތަކަމުގެ ޗޭކަނުން އަބަދު ވެސް ދިވެހިން ގުޅިފައިވާކަމަށް މޭޔަރ ވަނީ ސިފަ ކުރައްވާފައެވެ. 

"މި ދުވަހުން އަންގައިދިނީ، ދިވެހިންނަކީ ހުރިހައި ޙާލަތެއްގައި ވެސް އެކަކު އަނެކަކަށް ޓަކައި ތިބޭ ބައެއްކަން. އެކެއްގެ އިޙުސާސްތަކާއި އުދާސްތައް އަނެކަކަށް އެނގޭކަން. އެއްބައިވަންތަކަމުގެ ޗޭކަނުން އަބަދު ވެސް ދިވެހިން ގުޅިފައިވާކަން. ހުރިހައި ވަގުތެއްގައި، ހުރިހައި ޙާލަތެއްގައި ދިވެހިންގެ ކިބައިގައި މި ސިފައަށަގަންނަވާށި" މޭޔަރ ޢާޒިމް ވިދާޅުވިއެވެ. 

2004 ޑިސެމްބަރ ގެ ސުނާމީއަށް މިއަދު 21 އަހަރު ފުރިގެން ދާއިރު، މި ހިތާމަވެރި ކާރިސާގައި ރާއްޖޭގެ ނުވަ ރަށެއް ފިޔަވާ އެހެން ހުރިހާ ރަށަކަށް އަސަރުކޮށްފައިވެއެވެ. އަދި 82 ދިވެހިން ނިޔާވެ، 26 ދިވެހިން ވީނުވީއެއް ނޭނގި ގެއްލިފައިވާ އިރު، މި ކާރިސާގައި އެތައް ބެއެއްގެ ގެދޮރު ވަނީ ގެއްލިފައެވެ. 

އެ ދުވަހު ހާލުގައި ޖެހުނު ފަރާތްތަކަށް އެހީވުމުގައާއި، މި ކާރިސާއިން އަރައިގަތުމަށް ދިވެހިން ދެއްކި އެއްބައިވަންތަކަމުގެ ރޫހު ފާހަގަކުރުމުގެ ގޮތުން ކޮންމެ އަހަރެއްގެ ޑިސެމްބަރު 26 ވަނަ ދުވަހަކީ އެއްބައިވަންތަކަމުގެ ދުވަހުގެ ގޮތުގައި ސަރުކާރުން ވަނީ ހަމަޖައްސަވާފައެވެ. 

ދިވެހިންނަކީ އަބަދުވެސް އެއްބައިވަންތަކަމުގެ ޗޭނަކުން ގުޅިފައިވާ ބައެއް:  މޭޔަރ އާދަމް ޢާޒިމް 

މާލޭ ސިޓީ ކައުންސިލްގެ ކޮމިއުނިޓީ އެންގޭޖްމެންޓް ޔުނިޓުން ހިންގާ ހާއްސަ އޮޕަރޭޝަންގައި، ފާއިތުވި ތިން މަސް ދުވަހުގެ ތެރޭ މާލޭގެ އެކި ސަރަހައްދަކުން 42.15 ޓަނުގެ ކުނި ނަގާ ސާފުކޮށްފިއެވެ. 

މި އޮޕަރޭޝަން ހިންގާފައިވަނީ މާލެ ސާފުތާހިރުކޮށް ބެހެއްޓުމާއި މަގުތައް ހިތްފަސޭހަ ކުރުމުގެ މަޤްސަދުގައެވެ.

މި އޮޕަރޭޝަންގައި ކުނި ނަގާ ސާފުކޮށްފައިވާ، މާލޭގެ ފަސް ގެ އެއް ހިމެނެއެވެ. އެގޮތުން އެ ފަސް ގެއިން ޖުމްލަ 17.85 ޓަނުގެ ކުނިވަނީ ނަގާފައެވެ. އެ ގެ ތަކުގެ ތެރޭގައި ހިމެނެނީ މ. ކެލިފޯނިޔާ އިން 4.2 ޓަނު ކުންޏާއި، ހ. މައިނާގެ އިން 5.25 ޓަނުގެ ކުންޏާއި، ގ. ރަބީޢުވިލާ އިން 7.35 ޓަނުނުގެ ކުންޏާއި، މ. ޕެންޒީ ގާރޑެން އިން 0.35 ޓަނުގެ ކުނީގެ އިތުރުން ގ. ހާމަގެ އިން 0.7 ޓަނުގެ ކުންޏެވެ. 

މި އޮޕަރޭޝަންގައި މީގެ ކުރިން ވެސް މާލޭގެ ތިން ސަރަހައްދަކުން ވަނީ ކުނިނަގާ ސާފުކޮށްފައެވެ. އެއީ ބާޒާރުމަތީ ވަދުފޮށި ކަންމައްޗާއި، ޒައިތުއްމާ ކުރިމަތީ ޕޭވްމަންޓް މަތީ މުދާ ބަހައްޓައިގެން ވިޔަފާރިކުރި ފަރާތްތައް ހުއްޓުވައި، އެތަން ސާފުކޮށް ނެގި ކުންޏާއި  އާއްމުކޮށް ކުނި ބަހައްޓާފައި ހުންނަ ސަރަހައްދެއް ކަމަށްވާ އާބުރުޒު މަގު ފުއްކަފަ ގޯޅި ކަންމަތިން ނެގި ކުންޏެވެ. 

މާލެ ސިޓީގެ ކޮންމެ މަގެއްވެސް ހިތް ފަސޭހަ ކަމާއެކު އޮންނަ މަގަކަށް ހެދުމަކީ މާލެ ސިޓީ ކައުންސިލުން ނުހަނު ބޭނުންވާ ކަމެކެވެ. މަގުތަކުގައި ހުންނަ ކާނުތަކުގައި ކުނި ގިނަވުމުގެ ސަބަބުން އެކި ދަތިތަކާއި ކުރިމަތިލާން ޖެހި، އެއީ ރައްޔިތުންނަށް ދިމާވާ ބޮޑު މައްސަލައެއް ކަމަށް ކައުންސިލުން ފާހަގަކުރެއެވެ.

މާލެ ސިޓީގެ މޭޔަރ އާދަމް ޢާޒިމް ވިދާޅުވީ، މަގުތަކުގައި ހުންނަ ކާނުތަކުގައި ކުނި ގިނަވުމުގެ ސަބަބުން އެކި ދަތިތަކާއި ކުރިމަތިލާން ޖެހޭ ކަމަށާއީ މަގުތަކުގައި ފެން ބޮޑު ވުމަކީ ވެސް ކާނުތަށް ފުރި ބާރުވުމުގެ ސަބަބުން ކުރިމަތިވާ ކަމެއް ކަމަށެވެ. އަދި މި ކާނުތަކުގައި ކުނި ގިނަވެ ތާށިވުމުން މާލެއަށް ވިއްސާރައިގެ އަސަރުކުރާ ކޮންމެ ފަހަރަކު ކާނުތަކުން ކުނިތައް އެޅުމުން އެކި ކަހަލަ ނަޖިސް މަގުތައް މަތީ ފެތުރޭ ކަމަށް ވެސް މޭޔަރ ޢާޒިމް ވިދާޅުވި އެވެ. 

މޭޔަރ ޢާޒިމް ވިދާޅުވީ، މާލެ ވިލިމާލެ ސާފުތާހިރުކޮށް ބޭއްވުމަށް، ކައުންސިލްގެ މުވައްޒަފުން ކޮންމެ ދުވަހެއްގެ ހެނދުނުން ފެށިގެން ދުވަސް ނިމެންދެން ކުނި ނެގުމުގެ މަސައްކަތް ކުރައްވަމުން އަންނަ ކަމަށާއި އެގޮތުގެ މަތިން މާލެ އާއި ވިލިމާލޭގެ އެއްގަމާއި ފަޅުތެރެއިން ދުވާލެއްގެ މައްޗަށް 30 އާއި 40 ޓަނާ ދެމެދުގެ ކުނި ނަގާ ކަމަށެވެ. 

އެގޮތުން ކުރިއަށް އޮތް ތަނުގައި ސިޓީ ކައުންސިލުން ކުރަންޖެހޭ މަސައްކަތްތަކަށް ފޯކަސްކޮށްގެން ވަރަށް ބޮޑަށް މަސައްކަތްތައް ކުރިއަށް ގެންދާނެކަމުގެ ޔަގީންކަން މޭޔަރ ޢާޒިމް ދެއްވިއެވެ. 

ކުނީގެ މައްސަލައަކީ އެ ތަނެއްގައި ދިރިއުޅޭ ރައްޔިތުންގެ ވިސްނުމާ ވަރަށް ބޮޑަށް ގުޅިފައިވާ ކަމަކަށް ވުމުން މާލެ ސިޓީގެ ކުނި މެނޭޖުކޮށް، ސާފު، ރީތި، ހިތްގައިމު، ސިޓީއަކަށް ހެދުމަށް، މާލެ ސިޓީން ކުރަމުންދާ މަސައްކަތަށް އެއްބާރުލުން ދެއްވުމަށް، މަގުތަކާއި ޕާކުތަކާއި މައިޒާން ތަކާއި އަދި ފަޅުތެރެއަށް ވެސް ކުނި ނޭއްޅުއްވުމަށް ލޮބުވެތި ރައްޔިތުންނަށް ކައުންސިލުން އަންނަނީ ތަކުރާރުކޮށް އިލްތިމާސްކުރަމުންނެވެ. 

މާލެ ސާފުތާހިރުކޮށް ބޭއްވުމަށް ކުރިއަށް ގެންދާ ޚާއްސަ އޮޕަރޭޝަންގައި، ފާއިތުވި ތިން މަހު 42.15 ޓަނުގެ ކުނި ނަގައިފި

ފުރަ މާލެ ސަރަހައްދުގެ ވައި ނުސާފުވެ، ވައިގެ ފެންވަރު ދަށްވަމުންދާތީ، އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި މާސްކު އެޅުމަށާއި ބޭރަށް ނިކުމެ އުޅުން މަދުކުރުމަށް މާލެ ސިޓީގެ މޭޔަރު އާދަމް އަޒީމް އިލްތިމާސްކުރައްވައިފިއެވެ.

ފާއިތުވި އަހަރުތަކުގައިވެސް މި ދުވަސްވަރަކީ މާލެ 

ސަރަހައްދުގެ ވައި ނުސާފުވާ ދުވަސްވަރެއް ނަމަވެސް، މި އަހަރުގެ ތަފާސްހިސާބުތަކުން ދައްކާގޮތުގައި ވައިގެ ނުސާފުކަން ކުރީ އަހަރުތަކަށްވުރެ ބޮޑަށް ވަނީ އިތުރުވެފައެވެ. މިކަމާ ގުޅިގެން މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން ވަނީ ރާއްޖޭގެ ސަރަހައްދުގައި ދުންފިނި ބޯވެ، ވައި ނުސާފުވުމުގެ ސަބަބުން ސަމާލުވުމަށް އެލާޓް ނެރެފައެވެ.

މޭޔަރު އާދަމް އަޒީމް ސޯޝަލް މީޑިއާ އެކްސް (X) މެދުވެރިކުރައްވައި ދެއްވި މެސެޖެއްގައި، ސިއްހީ މާހިރުންގެ އިރުޝާދުތަކާ އެއްގޮތަށް އަމަލުކުރުމުގެ މުހިންމުކަން ފާހަގަކުރައްވައި، ރައްކާތެރިކަމުގެ ފިޔަވަޅުތައް އެޅުމަށް ބާރުއަޅުއްވާފައިވެއެވެ.

މޭޔަރު ވިދާޅުވީ، "ސިއްހީ މާހިރުން އިރުޝާދު ދެއްވާފައިވާ ފަދައިން ހުރިހާ ރައްޔިތުންވެސް ރައްކާތެރިކަމުގެ ފިޔަވަޅުތައް އެޅުއްވުމަށް އަޅުގަނޑު އިލްތިމާސްކުރަން. މިހާރު ވައި ނުސާފުވެފައިވާ މިންވަރަށް ބަލައި، ބޭރަށް ނިކުންނަވާއިރު މާސްކު އެޅުއްވުމަށާއި، ކޮންމެހެން ބޭރަށް ނިކުންނަންޖެހޭ ހާލަތެއްގައި ނޫނީ ބޭރަށް ނުނިކުމެ މަޑުކޮށްލެއްވުމަށް އިލްތިމާސްކުރަން،" ކަމަށެވެ.

މީގެ އިތުރުން، ވައި ނުސާފުވުމުގެ ސަބަބުން ކުޑަކުދިންނާއި، އުމުރުން ދުވަސްވީ މީހުން އަދި ނޭވާލާ ނިޒާމުގެ ބަލިތައް ހުންނަ ފަރާތްތަކަށް ސިއްހީ ބޮޑެތި ނުރައްކާތަކެއް ކުރިމަތިވެދާނެކަން މޭޔަރު ފާހަގަކުރެއްވިއެވެ.

އެހެންކަމުން، ރަސްމީ އިދާރާތަކުން ދޭ އިރުޝާދުތަކަށް ސަމާލުކަން ދެއްވައި، އަމިއްލަ ސިއްހަތަށް އިސްކަންދެއްވުމަށް ހުރިހާ ރައްޔިތުންނަށް އިލްތިމާސްކުރަމެވެ.

The Mayor of Male’ City, Adam Azim, has issued an urgent advisory calling on all residents of the Greater Male’ area to wear face masks and limit outdoor activities due to a significant decline in air quality.

Recent years, the Male’ City area has experienced seasonal air pollution during this period. However, current data and observations indicate that the situation this year has worsened considerably compared to previous years. The Maldives Meteorological Service has issued alerts regarding the hazy conditions and reduced air clarity affecting the region.

In a statement shared on the social media platform X (formerly Twitter), Mayor Adam Azim emphasized the importance of following the guidance provided by health professionals to mitigate the risks associated with poor air quality.

"I urge all citizens to take the necessary precautions as advised by medical professionals. Due to the current air pollution levels, it is highly recommended to wear masks and avoid going outdoors unless absolutely necessary until air clarity improves," stated Mayor Azim.

The Mayor Adam Azim highlights that high levels of pollutants can pose serious health risks, particularly to children, the elderly, and those with pre-existing conditions.

ވައި ނުސާފުވުމުގެ ސަބަބުން ރައްކާތެރިކަމުގެ ފިޔަވަޅު އެޅުމަށާއި މާސްކު އެޅުމަށް މާލެ ސިޓީގެ މޭޔަރު އިލްތިމާސްކުރައްވައިފި

Mayor Adam Azim Urges Public to Wear Masks and Take Precautions Due to Deteriorating Air Quality

ވިލިމާލޭގައި ސްކޭޓް ޕާކަކާއި ހިތްފަސޭހަ މައިޒާނެއް ހަދައި ތަރައްޤީކޮށް ބެލެހެއްޓުމުގެ ޚިދުމަތް ދިނުމަށްޓަކައި މާލޭ ސިޓީ ކައުންސިލުން ސްޓޭޓް ޓްރޭޑިންގ އޮގަނައިޒޭޝަން ޕަބްލިކް ލިމިޓެޑް (އެސްޓީއޯ) އާއެކު އެއްބަސްވުމުގައި ސޮއިކޮށްފިއެވެ.

ސްކޭޓްޕާކާއި ހިތްފަސޭހަ މައިޒާން ތަރައްޤީ ކުރުމަށް ކައުންސިލްގެ ފަރާތުން ސޮއި ކުރެއްވީ ސެކްރެޓަރީ ޖެނެރަލް ޢަބްދުލް މުހައިމިން ނަޞީރު އެވެ. އެސްޓީއޯގެ ފަރާތުން ސޮއިކުރެއްވީ ޑައިރެކްޓަރ އޮފް ޕްރޮޖެކްޓްސް އެންޑް އެސެޓްސް މުޙައްމަދު އިޙްސާން ވަހީދުއެވެ. 

ސްކޭޓްޕާކާއި ހިތްފަސޭހަ މައިޒާން، ވިލިމާލޭގައި ތަރައްޤީ ކުރަން ކައުންސިލުން ނިންމާފައިވަނީ، ވިލިމާލެ ފެރީޓަރމިނަލް ސަރަހައްދުގައި އޮތް އައުޓްޑޯ ޖިމް އަދި ޕާކް ހިމެނޭ ބިމުގައިއެވެ.

މި ދެ މަސައްކަތް ވެސް ކުރިއަށް ގެންދިއުމަށް ހަމަޖެހިފައިވަނީ ދެ ފޭސް އަކަށް ބަހާލައިގެންނެވެ. 

މޭޔަރ އާދަމް ޢާޒިމް ވިދާޅުވީ ސްކޭޓް ޕާކާއެކު މި ކުޅިވަރަށް  ޝައުޤުވެރިކަން ހުންނަ ވިލިމާލޭގެ ޒުވާނުންނާއި ތުއްތު ކުދިނަށް ފަހި ފުރުޝަތުތަކެއް ލިބިގެން ދާނެ ކަމަށެވެ. އަދި ހިތް ފަސޭހަ މައިޒާނަކާއެކު ، ވިލިމާލެއަށް މިހާ ބޮޑެތި ބަދަލުތަކެއް ގެނެވިގެން މިދަނީ ވިލިމާލޭގައި ދިރި އުޅޭ ރައްޔިތުން އުފާކޮށް އެމީހުންނަށް ހިތްފަސޭހަ މާހައުލެއް ޤާއިމް ކުރުމުގެ މަގްސަދުގައި ކަމަށް ވެސް މޭޔަރ ޢާޒިމް ވިދާޅުވިއެވެ. 

ސްކޭޓްޕާކާއި ހިތްފަސޭހަ މައިޒާން ތަރައްޤީ ކުރުމަށް ކައުންސިލުން ފާސްކޮށފައި ވަނީ 22 އޮކްޓޯބަރ 2025 ވަނަ ދުވަހު ބޭއްވި ކައުންސިލްގެ 4 ވަނަ ދައުރުގެ 217 ވަނަ ރަސްމީ އާންމު ޖަލްސާގައެވެ. 

ވިލިމާލޭގައި ސްކޭޓް ޕާކަކާއި ހިތްފަސޭހަ މައިޒާނެއް ތަރައްޤީކޮށް ބެލެހެއްޓުމުގެ އެއްބަސްވުމުގައި ސޮއިކޮށްފި

މާލެ ސިޓީގެ މުސްތަޤުބަލުގެ ޕްލޭންތައް އެކުލަވާލައި ނިންމާނީ "ބަންދު ކޮޓަރިތަކެއްގެ" ތެރޭގައި ނޫން ކަމަށާއި، އެކަން ކުރާނީ ރައްޔިތުންގެ ފުރިހަމަ ބައިވެރިވުމާއި މަޝްވަރާއާއެކު ކަމަށް މާލެ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ.

މޭޔަރ އާދާމް ޢާޒިމް މިހެން ވިދާޅުވީ، މާލޭގެ "ރިވައިޒްޑް ލޭންޑް ޔޫސް ޕްލޭން" ނުވަތަ ބިމުގެ ޕްލޭނާ ގުޅޭގޮތުން ރައްޔިތުންގެ ޚިޔާލު ހޯދުމަށް މިއަދު މީރުމާ މާލަމުގައި ބޭއްވި ޚާއްޞަ މަޝްވަރާ ބައްދަލުވުމުގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން މޭޔަރ އާދާމް ޢާޒިމް ވިދާޅުވީ، މިއަދުގެ ބައްދަލުވުމަކީ ހަމައެކަނި ރަސްމީ ބައްދަލުވުމެއް ނޫން ކަމަށާއި، މިއީ 2030 އަދި 2050 ވަނަ އަހަރު މާލެ އޮންނާނެ ގޮތް ކަނޑައެޅުމަށް ލިބޭ މުހިންމު ފުރުޞަތެއް ކަމަށެވެ.

"އަޅުގަނޑުމެންނަށް މައްސަލަތައް އެނގޭ. އިދާރީ ހިންގުމުގެ ދަތިކަމާއި، ބޯހިޔާވަހިކަމުގެ ޕްރެޝަރާއި، ޒަމާންވީ އުމްރާނީ މައްސަލަތައް އެބަހުރި. މިއީ ދުރުގައިވާ ކަންކަމެއް ނޫން، މިއީ އަޅުގަނޑުމެންގެ ޢާއިލާތަކުން ކޮންމެ ދުވަހަކު ތަޙައްމަލުކުރާ ޙަޤީޤަތް،" މާލެއަށް ދިމާވެފައިވާ ގޮންޖެހުންތަކަށް އަލިއަޅުވާލައްވަމުން މޭޔަރ އާދާމް ޢާޒިމް ވިދާޅުވިއެވެ.

މި ގޮންޖެހުންތަކުން އަރައިގަތުމަށްޓަކައި މޭޔަރ އާދާމް ޢާޒިމް ގެންގުޅުއްވާ ތަޞައްވުރު ވެސް މިއަދުގެ ބައްދަލުވުމުގައި ވަނީ ހިއްސާކުރައްވާފައެވެ. އޭގެ ތެރޭގައި:

 * ޒަމާނީ އަދި ފަސޭހަ ދަތުރުފަތުރުގެ ނިޒާމެއް ޤާއިމުކުރުން.

 * މޫސުމީ ބަދަލުތަކަށް ވިލުންތެރި، ފެހި ސިޓީއަކަށް މާލެ ހެދުން.

 * އިޤްތިޞާދީ އަދި ވިޔަފާރީގެ އާ ފުރުޞަތުތައް ފަހިކޮށްދިނުން.

 * ސަޤާފަތް ދަމަހައްޓައި، އެންމެންނަށްވެސް ރައްކާތެރި މާހައުލެއް ޤާއިމުކުރުން ހިމެނެއެވެ.

ކުރިއަށް އޮތް އިންތިޚާބުގައި ދެވަނަ ދައުރަކަށް ވާދަކުރައްވާ މޭޔަރ އާދަމް ޢާޒިމް ފާހަގަކުރެއްވި ގޮތުގައި، އެމަނިކުފާނު ވަކާލާތު ކުރައްވަނީ މި ތަޞައްވުރު ޙަޤީޤަތަކަށް ހެދުމަށެވެ. އަދި ރައްޔިތުންގެ އިތުބާރާއެކު މާލޭގެ ޕްލޭންތައް ތަންފީޒުކުރުމުގައި ރައްޔިތުންގެ ބައިވެރިވުން އެންމެ މަތީ ދަރަޖައަކަށް އޮންނާނެކަމުގެ ޔަޤީންކަން އެމަނިކުފާނު ދެއްވިއެވެ.

"އަޅުގަނޑުމެން މިތިބީ ވަކި ޕްލޭންތަކެއް ލާޒިމުކުރާކަށް ނޫން. އަޅުގަނޑުމެން މިތިބީ އަޑުއަހަން. ތިޔަބޭފުޅުންގެ ބައިވެރިވުމުން ކަށަވަރުކޮށްދޭނީ މާލޭގެ މުސްތަޤުބަލަކީ ބަންދު ކޮޓަރިތަކެއްގައި ނިންމާ ނިންމުމަކަށް ނުވުން،" މޭޔަރ އާދަމް ޢާޒިމް ވިދާޅުވިއެވެ.

މޭޔަރ އާދާމް ޢާޒިމް ވާހަކަފުޅު ނިންމަވާލެއްވީ، މާލެއަކީ ހަރުދަނާ ތަޞައްވުރަކާއެކު ޒިންމާދާރުކޮށް ހިންގޭނެ ސިޓީއެއްކަން ސާބިތުކޮށްދިނުމަށް ރައްޔިތުންނަށް ގޮވާލައްވަމުންނެވެ. 

މާލޭގެ މުސްތަޤުބަލު ކަނޑައަޅާނީ ބަންދު ކޮޓަރީގައެއް ނޫން، ރައްޔިތުންނާއެކު: މޭޔަރ އާދަމް ޢާޒިމް 

މާލޭގައި މީދާ ގިނަވުމުގެ ސަބަބުން، ރައްޔިތުންނަށް ކުރިމަތިވަމުންދާ އުދަގޫތައް ހައްލުކުރުމަށް ޓަކައި، މާލެ ސިޓީ ކައުންސިލުން ޚާއްޞަ ހަރަކާތެއް މިއަދު ފަށައިފިއެވެ.

މި ހަރަކާތް ރަސްމީކޮށް ފައްޓަވައި ދެއްވީ މާލެ ސިޓީގެ މޭޔަރ އާދަމް ޢާޒިމެވެ.

މާލޭގެ އެންމެ ކާރުބާރުބޮޑު އެއް ސަރަހައްދު ކަމަށްވާ ލޯކަލް މާރުކޭޓް ސަރަހައްދުން، މި ހަރަކާތް ފަށައިފައިވަނީ، މިއަދު ހެނދުނުއެވެ. މާލޭގައި މީދާ ގިނަ ވުމުގެ ސަބަބުން، އާންމު ރައްޔިތުންނަށް އޭގެ އުނދަގޫ އިންތިހާއަށް ކުރިމަތިވަމުން އަންނަ ކަމުގެ ގިނަ ޝަކުވާތަކެއް ކައުންސިލަށް އަންނަނީ ލިބެމުންނެވެ. 

މާލެއިން މީދާ މަދުކުރުމުގެ ހަރަކާތް ފައްޓަވައި ދެއްވަމުން، މޭޔަރ ޢާޒިމް ވިދާޅުވީ، މި ހަރަކާތް މިއަދު ލޯކަލް މާރުކޭޓް ސަރަހައްދުގައި ފެށުނު ކަމުގައި ވިޔަސް، ކުރިއަށް އޮތް ދުވަސްތަކުގައި މާލޭގެ އެކި ސަރަހައްދުތަކުގައި މިހަރަކާތް ކުރިއަށް ގެންދަވާނެ ކަމަށެވެ.

މީގެ އިތުރުން މޭޔަރު ޢާޒިމް ވިދާޅުވީ، މި ހަރަކާތް ހިންގަނީ ކައުންސިލްގެ މުވައްޒަފުން ކަމަށާއި، މީދާ މަރާނީ، މީދާ މަރާ ބޭސް، އެކި ތަންތަނަށް އަޅައިގެން ކަމަށެވެ. މި ހަރަކާތުގެ ސަބަބުން މާލޭގެ ސާފުތާހިރުކަން އިތުރުވެ، ރައްޔިތުންނަށް ކުރިމަތިވަމުންދާ، މީދާގެ އުދަގޫތައް ކުޑަވެގެންދާނެކަމަށް ބެލެވޭ ކަމަށް ވެސް މޭޔަރ ޢާޒިމް ވިދާޅުވިއެވެ. 

މި ހަރަކާތުގެ ތެރެއިން މީދާ މަރުވުމުން، އެ މީދާތައް އެއްކޮށް ނެގުމުގެ މަސައްކަތް ވެސް މާލެ ސިޓީ ކައުންސިލުން ކުރިއަށް ގެންދިއުމަށް ވަނީ ހަމަޖެހިފައެވެ. އަދި މިހަރަކާތަކީ މާލެ ސިޓީ ކައުންސިލްގެ ހެލްތް ޕޮލިސީގެ ދަށުން ކުރިއަށް ގެންދާ ހަރަކާތެކެވެ. 

މިހަރަކާތުގައި މޭޔަރ ޢާޒިމްގެ އިތުރުން ބައެއް ކައުންސިލަރުންނާއި ޑަބްލިއުޑީސީގެ ރައީސާގެ އިތުރުން ކައުންސިލްގެ އިސްވެރިން ބައިވެރިވެ ވަޑައިގެންނެވިއެވެ. 

މާލެއިން މީދާ މަދުކުރަން ކައުންސިލުން ނިކުމެއްޖެ 

ގިނަ އަހަރުތަކެއް ވަންދެން އެއްވެސް ބޭނުމެއް ނުހިފި، ވީރާނަވަމުން ދިޔަ ގަލޮޅު ސިޓީ ޕާކް ތަރައްޤީ ކުރުމުގެ މަސައްކަތް މިމަހުގެ ނިޔަލަށް ނިންމަން މަސައްކަތް ކުރަމުން އަންނަ ކަމަށް މާލެ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ.

މި މަސައްކަތް ކުރިއަށް ގެންދަނީ މާލެއަކީ އަމާން، ހިތްފަސޭހަ، ރައްކާތެރި އަދި އެކަކު އަނެކަކަށް އަޅާލައި، ހިތްހެޔޮ، އޯގާތެރި ރައްޔިތަކު ދިރިއުޅޭ ސިޓީއަކަށް ހެދުމަށް މާލެ ސިޓީ ކައުންސިލުން ކުރައްވަމުން ގެންދަވާ ގިނަ މަސައްކަތްތަކުގެ ތެރެއިން މުހިންމު މަސައްކަތެއްގެ ގޮތުގައެވެ.

މޭޔަރ ޢާޒިމް ވިދާޅުވީ ގަލޮޅު ސިޓީ ޕާކުގެ މަސައްކަތް ކުރިއަށްދާ ގޮތާއި ބެހޭ ގޮތުން މަޢުލޫމާތު ދެއްވަމުންނެވެ. އެމަނިކުފާނު ވިދާޅުވި ގޮތުގައި، ގަލޮޅު ސިޓީ ޕާކަކީ ގަލޮޅުގެ ރައްޔިތުންނަށް ހިތްފަސޭހަ މާޙައުލެއް ފޯރުކޮށްދިނުމަށްޓަކައި މުހިންމު ތަނެއް ކަމަށެވެ. 

ދެ ފޭސްއަކަށް ބަހާލައިގެން ކުރިއަށްގެންދާ މި މަސައްކަތް ކުރިއަށް ދަނީ، ގަލޮޅު ރައްޔިތުންގެ ހިޔާލާއި މަޝްވަރާއާއެކު ކަމަށް ވެސް މޭޔަރ ޢާޒިމް ވަނީ ހާމަކުރައްވާފައެވެ.

ގަލޮޅު މެދު ދާއިރާގެ ކައުންސިލަރު މަރްޔަމް ރީހާން ނާޡިމް ވިދާޅުވީ ރައްޔިތުންގެ ބައިވެރިވުމާއެކު މި ޕާކް ތަރައްޤީ ކުރުމުގެ ސަބަބުން، އެ ސަރަހައްދުގެ ރައްޔިތުންގެ ބޭނުންތަކަށް ފެތޭނެ ތަނެއްކަން, މި ޕާކު ވެގެންދާނެ ކަމަށެވެ. 

ރީން ވިދާޅުވީ ގަލޮޅު  ޕާކުގެ މަސައްކަތް ނިމޭއިރު، ޕާކުގައި ކަސްރަތު ކުރުމަށް ބޭނުންވާ ވަސީލަތްތަކާއި  ބެންޑްމިންޓަން ކޯޓަކާއި ތްރީ އޮން ތްރީ ބާސްކެޓް ކޯޓަކާއި ކުޑަކުދިން ކުޅޭނެ ހުސް ސަރަހައްދަކާއި އަދި އައުޓްޑޯ ޖިމެއް ވެސް ތަރައްޤީ ކުރެވިފައިވާނެ ކަމަށާއި މި ޕާކުގައި އިވެންޓްތައް ބޭއްވުމަށް ޚާއްސަ ކުރެވިފައިވާ ސަރަހައްދަކާއި އުމުރުން ދުވަސްމީ ބޭފުޅުން ހިތްހަމަ ޖައްސާލުމަށް މަޑުކޮށްލައިގެން ތިބުމަށް ތައްޔާރުކޮށްފައިވާ ސަރަހައްދެއް ވެސް ވަނީ ތަރައްޤީކުރެވިފައި ކަމަށް ރީން ވިދާޅުވިއެވެ. 

މި ޕާކުގައި މިހާރު ކުރަމުން އަންނަނީ ކުލަލުމުގެ މަސައްކަތާއި ވޯކްވޭތަކުގައި އީ.ޕީ.ޑީ.އެމް ފްލޯރިންގ އެޅުމުގެ މަސައްކަތެވެ. 

ގަލޮޅު ސިޓީ ޕާކާއެކު، ގަލޮޅުގެ ރައްޔިތުންނަށް އާރޯކަމާއެކު އުފާވެރިކަން!

ދިގު މުއްދަތެއްގައި، މެދު ކެޑުމެއްނެތި މާލެ ސިޓީއަށާއި، މާލެ ސިޓީގެ އަންހެނުންގެ ތަރައްޤީއަށް މަސައްކަތް ކޮށްދެއްވާފައިވާ 11 ބޭފުޅަކަށް މިއަހަރުގެ ރަނި އެވޯޑް އަރުވައިފިއެވެ. 

މާލެ ސިޓީ ހޯލްގައި އިއްޔެ ރޭ ބޭއްވި މި ރަސްމިއްޔާތު ޝަރަފުވެރި ކޮށްދެއްވީ، ނިޝާން ޢިއްޒުއްދީންގެ އިއްޒަތުގެ ވެރިޔާ، އޮނަރަބަލް އަނީސާ އަޙްމަދާއި، މާލެ ސިޓީގެ މޭޔަރ އާދަމް ޢާޒިމެވެ. 

މި ރަސްމިއްޔާތު ޝަރަފުވެރި ކޮށްދެއްވައި މާލެ ސިޓީގެ މޭޔަރ އާދަމް ޢާޒިމް ދެއްކެވި ވާހަކަ ފުޅުގައި، ޤައުމެއްގެ ތަރައްޤީއަށް އަންހެނުންގެ އިސްނެގުމާއި ބައިވެރި ވުމަކީ މުހިއްމު ކަމެއް ކަމަށް ދެކޭ ކަމަށާއި، އިޤްތިސާދީ، އިޖްތިމާޢީ އަދި އިންސާނީ ވަސީލާތްތައް ބިނާކޮށް، ތަރައްޤީ ކުރުމަށް އަންހެނުންގެ ހިއްސާގެ މުހިއްމު ކަން ފާހަގަކުރެއްވިއެވެ. 

ސިޔާސީ މަސްރަހުގައާ ގައުމުގެ އިސް މަޤާމުތަކުގައި އަންހެނުން ތަމްސީލްވާންޖެހޭ މިންވަރަށް އެކަން ނުދާކަމަށް ދެކޭކަން ހާމަކުރައްވައި، މޭޔަރ ޢާޒިމް ވިދާޅުވީ، ޤައުމުގެ މުހިއްމު ނިންމުން ތަކުގައި މިހާރަށް ވުރެ ބޮޑަށް އަންހެނުންގެ ބައިވެރިވުން ހިމެނެން ޖެހޭ ކަމަށް ދެކެވަޑައިގަންނަވާ ކަމަށާއި، އެކަން ކާމިޔާބުވާނީ، ދިމާވާ ގޮންޖެހުން ތަކަށް އަންހެނުން ކުރިމާލައިގެން ކަމަށެވެ. 

މި ރައްމިއްޔާތުގައި ނިޝާން ޢިއްޒުއްދީންގެ އިއްޒަތުގެ ވެރިޔާ، އޮނަރަބަލް އަނީސާ އަޙްމަދު ވެސް ވަނީ ވާހަކަ ފުޅު ދައްކަވާފައެވެ. އަނީސާގެ ވާހަކަފުޅުގައި، ޚިދުމަތެއް ފައްޓާ، ޚިދުމަތެއް ފުޅާކޮށް އެކަން ކުރިޔަށްގެންދިއުމަށް ޓަކައި، އެކަން ބަލައި ގަންނާނެ ބަޔަކު ތިބުމަކީ އެ ޚިދުމަތެއް ދޭ މީހަކަށް ލިބިގެންދާ ވަރަށް ބޮޑު ހިތްވަރެއްކަން ފާހަގަ ކުރައްވާފައެވެ.

އެގޮތުން އަންހެންގެ ތަރައްޤީއަށް މަސައްކަތް ކުރާ ކޮމެޓީން މިފަދަ އެވޯޑެއް ދެއްވާ ކަމަށް ޓަކައި އެ ކޮމެޓީ އަށް ޝުކުރުއަދާ ކުރައްވާފައެވެ. އަދި މިފަދަ އެވޯޑް ތަކުގެ ސަބަބުން މުޖުތަމަޢުގައި ޚިދުމަތްތެރިންގެ އިތުރުވެ، މީހުންގެ ޝައުޤުވެރިކަން އިތުރުވެގެންދާނެ ކަމެއް ކަމަށް ފާހަގަކުރެއްވިއެވެ. 

މާލެ ސީޓީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ފަރާތުން ކޮންމެ އަހަރެއްގެވެސް އެ ކޮމެޓީގެ އަހަރީ ދުވަހާ ގުޅުވައިގެން ދޭ މި، އެވޯޑަކީ އަންހެނުންނަށް އިޖްތިމާއީ،އިގްތިޞާދީ އަދި ސިއްޙީ ދާއިރާގެ އިތުރުން ތައުލީމީ ދާއިރާ އާއި އިންސާނީ ޙައްޤު ދާއިރާ އަދި ސިޔާސީ ދާއިރާގައި ވަކާލާތު ކުރާ ފަރާތްތަކުގެ އަގު ވަޒަންކޮށް، ހިއްވަރު ދިނުމުގެ ގޮތުން ދެވޭ އެވޯޑެކެވެ. 

އެގޮތުން މިއަހަރު އެވޯޑް ލިބިވަޑައިގަތީ، ފާތިމަތު ޝަފާ (މ.ޖޯރުފީން)، އައިޝަތު ސަމީރާ މުޙައްމަދު (ގ.ގްރޭވިލާ)، ޝިޔާމާ އަހްމަދު (މ.ކަރޭޖް) އަދި ޒައިނަބް އަލީ (މ.އާސްތާ)އެވެ. އަދި މީގެ އިތުރުން، ޝަމްސިއްޔާ އުމަރް (މ.ކުޑަފަރުގެ)، ޑރ. ރަނާ އަހްމަދު ހަމީދު (މ.ކުރިނބީލޮޖް)، އައިޝަތް ޢަލީ (ގ.އަލީޝާ) އަދި އަމީނާ އަބްދުލް ގާދީރު (މއ.ޑެއިޒީ ވިލާ) ގެ އިތުރުން، އައިޝަތު ހިމްލާ (މ.މާކަރީ) އެވެ.

ރޭގެ ހަފްލާގައި މާލޭގެ ހަތަރު އަވަށްކަމުގައިވާ މާފަންނު، މައްޗަންގޯޅި، ގަލޮޅު އަދި ހެންވޭރު އަވަރަށް ނިސްބަތްވާ އަންހެނުންގެ ކޮމެޓީއަށް ގިނަ މަސައްކަތެއް ކޮށްދެއްވާފައިވާ ބޭފުޅުންނަށް އެބޭފުޅުން ކޮށްދެއްވާފައިވާ އަގުހުރި މަސައްކަތުގެ  އަގު ވަޒަންކުރުމުގެ ގޮތުން ޝަރަފުގެ ފިލާ އަދި ހަނދާނީ ލިޔުން ވަނީ 4 ފަރާތަކަށް އެރުވިފައެވެ. 

އެގޮތުން ޝަރަފުގެ ފިލާ ލިބިވަޑައިގެންނެވީ، މަފާންނު އަވަރު މެމްބަރު، އައިޝަތު ޔޫސުފާއި، ހެންވޭރު އަވަރު މެމްބަރު، ޢަޒީޒާ އުމަރާއި، މައްޗަންގޯޅި އަވަރު މެމްބަރު، ރަޒިއްޔާ މުޙައްމަދު ކަލޭފާނާއި، ގަލޮޅު އަވަށު މެމްބަރު، ސުނީތާ މުހައްމަދަށެވެ. 

މީގެ އިތުރުން ވެސް މި ރަސްމިއްޔާތުގައި މާލެ ސިޓީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ މެމްބަރުންގެ ގޮތުގައި ފާއިތުވި ތިން ދައުރުގައި މަސައްކަތް ކުރައްވާފައިވާ ފަރާތްތަކުގެ އަގު ވަޒަންކޮށް އެބޭފުޅުން ހަނދާނީ ލިއުން ވަނީ ދެއްވާފައެވެ. 

ރަނީ އެވޯޑަކީ މާލެ ސިޓީ އަންހެނުން ތަރައްޤީ އަށް މަސައްކަތްކުރާ ކޮމެޓީން އިސް ނަގައިގެން އަންހެނުންގެ އަގު ވަޒަންކޮށް ހިއްވަރު ދިނުމުގެ ގޮތުން 2021 ވަނަ އަހަރުން ފެށިގެން ދޭން ފެށި އެވޯޑެކެވެ.  

މިއަހަރުގެ ރަނި އެވޯޑް 11 ބޭފޫޅަކަށް

ފަރުދުންގެ ކަރާމާތާއި، ހަމަހަމަކަމާއި، އިންސާފު ކަށަވަރުކުރެވޭނެ ތަނަކަށް މާލެ ވެގެންދާނެ ކަމަށް މާލެ ސިޓީގެ މޭޔަރ އާދަމް ޢާޒިމް ވިދާޅުވިއެވެ. 

މޭޔަރ ޢާޒިމް މިފަދައިން ވިދާޅުވީ، ބައިނަލް އަޤްވާމީ ގޮތުން ފާހަގަ ކުރާ ދުނިޔޭގެ އިންސާނީ ހައްޤުތަކުގެ ދުވަހާއި ގުޅިގެން އެމަނިކުފާނުގެ އަމިއްލަފުޅު އެކްސްގައި ކުރެއްވި ޕޯސްޓެއްގައެވެ.

"މި އިންސާނީ ހައްގުތަކުގެ ދުވަހުގައި، ކޮންމެ ފަރުދެއްގެ ވެސް ކަރާމާތާއި، ހަމަހަމަކަމާއި، އިންސާފު ކަށަވަރުކުރެވޭނެ 

ތަނަކަށް މާލެ ސިޓީ ހެދުމަށް ޓަކައި އަޅުގަނޑުމެން ކުރާ މަސައްކަތުގެ ޔަގީންކޮށް އެކަން ފާހަގަކުރަން" މޭޔަރ އާދަމް ޢާޒިމް ވިދާޅުވިއެވެ. 

މޭޔަރ ޢާޒިމް ވިދާޅުވީ، މުޖުތަމައަށް ޓަކައި ރައްކާތެރި އެންމެން ބައިވެރިވާ ފަދަ މުސްތަޤުބަލެއް ބިނާކޮށް، ހުރިހާ އެންމެންގެ ހައްގުތައް ރައްކާތެރި ކުރުމަށް އެކުގައި މަސައްކަތް ކުރުމަށް ވެސް ގޮވާލައްވާފައެވެ. 

ދުނިޔޭގެ އިންސާނީ ހައްގުތަކުގެ ދުވަހުގެ ގޮތުގައި ފާހަގަ ކުރަމަށް އދ އިން ކަނޑައަޅާފައިވާ ދުވަހަކީ ކޮންމެ އަހަރެއްގެ ވެސް ޑިސެމްބަރު މަހުގެ 10 ވަނަ ދުވަހެވެ. 

މިއީ، ކޮންމެ އިންސާނަކަށް ވެސް އިންސާފާއި، އިންސާނީ ކަރާމާތާއި، އަމިއްލަ މިނިވަންކަން ޔަޤީންކޮށްދިނުމަށް ޓަކައި މުޅި ދުނިޔޭގައި އިންސާނީ ޙައްޤުތައް ކުރިއެރުވުމާއި ރައްކާތެރިކުރުމުގެ މަޤްސަދުގައި އދ އިން ފާހަގަކުރާ ދުވަހެކެވެ.

ފަރުދުންގެ ކަރާމާތާއި، ހަމަހަމަކަމާއި، އިންސާފު ކަށަވަރުކުރެވޭނެ ތަނަކަށް މާލެ ވެގެންދާނެ:  މޭޔަރ އާދަމް ޢާޒިމް

މަސްވެރިންނަށް ފަހި ގޮތްތައް ހޯދައިދިނުމުގައި ދެމިހުންނާނެ ކަމުގެ ޔަގީންކަން އަރުވާ ކަމަށް މާލެ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ.

މޭޔަރ ޢާޒިމް މިފަދައިން ވިދާޅުވީ މަސްވެރިންގެ ދުވަހާއި ގުޅިގެން މާލޭ މަސްމާރުކޭޓުގައި މަސްވެރިންގެ ފަރާތުން ބޭއްވި ގުޅުން ބަދަހި ކުރުމުގެ ކެއުމުގައި ބައިވެރިވެ ވަޑައިގެންނެ އެމަނިކުފާނުގެ އަމިއްލަ ފުޅު އެކްސް ގައި ކުރެއްވި ޕޯސްޓެއްގައެވެ. 

މި ޕޯސްޓްގައި އެމަނިކުފާން ވިދާޅުވީ، މަސްވެރިންގެ ދުވަހުގެ މުނާސަބަތުގައި މަސްވެރިން ބޭއްވި ކެއުމުގައި ބައިވެރިވެ ގިނަ އަދަދެއްގެ މަސްވެރިންނާއި އެއް ތަނަކުން ބައްދަލުވެ ވާހަކަދެކެވުމަކީ އެމަނިކުފާނަށް ލިބުނު ވަރަށް ބޮޑު އުފަލެއް ކަމަށެވެ. 

"މަސްވެރިންގެ ދުވަހުގެ މުނާސަބަތުގައި މަސްވެރިން ބޭއްވި އެކުވެރިކަމުގެ ކެއުމުގައި ބައިވެރިވެ ގިނަ އަދަދެއްގެ މަސްވެރިންނާއި އެއް ތަނަކުން ބައްދަލުވެ ވާހަކަދެކެވުމަކީ އަޅުގަނޑަށް ލިބުނު ވަރަށް ބޮޑު އުފަލެއް. މަސްވެރިންނަށް ފަހި ގޮތްތައް ހޯދައިދިނުމުގައި އަޅުގަނޑު ދެމިހުންނާނެ ކަމުގެ ޔަގީންކަން އަރުވަން" މޭޔަރ އާދަމް ޢާޒިމް ވިދާޅުވިއެވެ. 

މަސްވެރިންގެ މަސައްކަތުގެ އަގު ވަޒަން ކުރެއްވުމުގެ ގޮތުން މޭޔަރ ޢާޒިމް ވަނީ މަސްވެރިންނާއި، މަސްވެރި އާއިލާތަކަށާއި މަސްވެރިކަމުގެ ސިނާޢަތުގައި މަސައްކަތްކުރައްވާ ހުރިހައި ފަރާތްތަކަށް ދުވަހުގެ ތަހުނިޔާ ފޮނުއްވާފައެވެ. 

"މިއަދު ފާހަގަކުރަމުންދާ ދިވެހިރާއްޖޭގެ މަސްވެރިންގެ ދުވަހުގެ ހެޔޮ އެދުމާއި ތަހުނިޔާ، ދިވެހިރާއްޖޭގެ ހީވާގި، މުރާލި، ޚިދުމަތްތެރި، ލޮބުވެތި މަސްވެރިންނަށާއި މަސްވެރި އާއިލާތަކަށާއި މަސްވެރިކަމުގެ ސިނާޢަތުގައި މަސައްކަތްކުރައްވާ ހުރިހައި ފަރާތްތަކަށް އަރިސްކުރަން" މެޔަރ ޢާޒިމް ވިދާޅުވިއެވެ. 

މަސްވެރިކަމަކީ އެތައް ސަތޭކަ އަހަރެއް ވަންދެން، ދިވެހި އިޤުތިޞާދު އެ މަސައްކަތަށް ހަމައެކަނި ބިނާވެފައިވާ އެންމެ ގަދީމީ މަސައްކަތް ކަމަށާއި، 99 ޕަސެންޓް ކަނޑުގެ ގޮތުގައި ހިމެނިފައިވާ ދިވެހިރާއްޖޭގައި މިއަދު ވެސް އެންމެ ފުޅާކުރެވެން އޮތް ސިނާޢަތަކީ މަސްވެރިކަމުގެ ސިނާޢަތް ކަމުގައި މޭޔަރ ޢާޒިމް ވިދާޅުވިއެވެ. އަދި މަސްވެރިންގެ މަސައްކަތުގައި ބަރަކާތް ލައްވައި، މަސްވެރިންނަށް ހުރިހާ ގޮތަކުން ކާމިޔާބީއަށް އެދޭކަމަށް ވެސް މޭޔަރ ޢާޒިމްގެ ޕޯސްޓުގައި ވިދާޅުވިއެވެ. 

މީގެ އިތުރުން މޭޔަރ އާދަމް ޢާޒިމް ވަނީ މާލޭގެ ދެކުނު ފަރާތުގައި ކުރިއަށްދާ ބޮޑުކަންނެލީގެ މަސްވެރިން ކުރަމުން އަންނަ އިހުތިޖާޖްގައި ވެސް ބައިވެރިވެ ވަޑައިގަންނަވާފައެވެ. 

ދިވެހި ރާއްޖޭގައި މަސްވެރިންގެ ދުވަސް ފާހަގަކުރަނީ ކޮންމެ އަހަރެއްގެ ވެސް ޑިސެމްބަރު މަހުގެ 10 ވަނަ ދުވަހުއެވެ. މިއަހަރުގެ މަސްވެރިންގެ ދުވަސް ފާހަގަ ކޮށްފައި ވަނީ ރ. ދުވާފަރުގައެވެ. 

މަސްވެރިންނަށް ފަހި ގޮތްތައް ހޯދައިދިނުމުގައި ދެމިހުންނާނެ ކަމުގެ ޔަގީންކަން އަރުވަން: މޭޔަރ އާދަމް ޢާޒިމް

މާލެ ސިޓީ ކައުންސިލްގެ 1447 ވަނަ އަހަރުގެ ޤުރުއާން ، މަދަހަ މުބާރާތް ފަށައިފި އެވެ. 

މި މުބާރާތަކީ މާލެ ސިޓީ ކައުންސިލުން އިންތިޒާމްކޮށްގެން 2023 ވަނަ އަހަރުން ފެށިގެން ކޮންމެ އަހަރެއްގެ ބަރާކާތްތެރި ރަމަޟާން މަހާ ދިމާކޮށް ކުރިޔަށް ގެންދާ މުބާރާތެކެވެ. 

އާދިއްތަ ދުވަހު ރަސްމީ ގޮތުން މި މުބާރާތް ފައްޓަވައި ދެއްވައި، މާލެ ސިޓީގެ މޭޔަރ އާދަމް ޢާޒިމް ދެއްކެވި ވާހަކަފުޅުގައި، ކީރިތި ޤުރުއާން އުނގެނި، އުނގަންނައި ދިނުމަކީ ޒަމާނުއްސުރެ ދިވެހިންގެ ތެރޭގައި ބަދަލުނުވެ އޮތް ސަޤާފަތެއް ކަމަށާއި، މިފަދަ މުބާރާތްތަކަށް ބެލެނިވެރިންނާއި، ދަރިވަރުން ދެއްވާ އަހަމިއްޔަތުކަން ފާހަގަކުރެއްވިއެވެ. އަދި މި މުބާރާތައް ދަރިވަރުން ތައްޔާރުކުރެއްވުމަށް ބައެއް ބެލެނިވެރިން ވަރަށް ބޮޑު ހޭދައެއް ކުރައްވާކަން ވެސް މޭޔަރ ޢާޒިމް ވަނީ ފާހަގަކޮށްފައެވެ. 

"ދަރިވަރުންނާއި، ބެލެނިވެރިން މި މުބާރާތައް ދޭ ސަމާލުކަން ދަނީ ދުވަހެއް ދުވަހަކަށް އިތުރުވަމުން. އަދި މިއީ އަޅުގަނޑުމެން ވަރަށް އުފާ ކުރާ ކަމެއް. އަޅުގަނޑު މޭޔަރު ކަމާއި ހަވާލުވި ފަހުން ބޭއްވުނު އެންމެ ފުރަތަމަ މުބާރަތް، މާލެ ސިޓީ ކައުންސިލްގެ 3 ވަނަ މުބާރާތުގައި ބައިވެރީ 770 ދަރިވަރުން. އެހެންނަމަވެސް، މިއަދު މުބަރާތުގައި 3145 ދަރިވަރުން ބައިވެރިވާ ކަން އުފަލާއެކު ފާހަގަ ކުރަން. މިއީ ނިސްބަތުން ބޮޑު އަދަދެއް" މޭޔަރ ޢާޒިމް ވިދާޅުވިއެވެ.

މި މުބާރާތަށް ބެލެނިވެރިންނާއި ދަރިވަރުން ދޭ ސަމާލުކަމާއި، ޝައުޤުވެރިކަމުގެ ސަބަބުން މުބާރާތުގެ ވަނަތަކަށް ހޮވޭ ދަރިވަރުންނަށް ދޭ ފައިސާގެ އިނާމަށް ވެސް މިހާރު ވާނީ ބޮޑެތި ބަދަލުތަކެއް ގެނެވިފައި ކަމަށާއި، މުބާރަތުގެ ވަނަ ހޮވުމުގައި އިތުރަށް 4 ވަނަ އަދި 5 ވަނަ ވެސް ހޮވާ ގޮތަށް މި އަހަރުގެ މި މުބާރާތް އިންތިޒާމް ކޮށްފައިވާ ކަމަށް ވެސް މޭޔަރ ޢާޒިމްގެ ވާހަގަފުޅުގައި ފާހަގަކުރެއްވިއެވެ. 

މި މުބަރާތް ކުރިޔަށް ގެންދިއުމަށްޓަކައި ސަލްމާން މިސްކިތް ބޭނުން ކުރެވޭނެ އިންތިޒާމް ހަމަޖައްސަވައިދެއްވި ކަމަށް ޓަކައި މިނިސްޓަރ އޮފް އިސްލާމިން އެފެއާރޒް ޑޮކްޓަރ މުޙައްމަދު ޝަހީމް ޢަލީ ސަޢިދަށް، މޭޔަރ ޢާޒިމް ވަނީ ޝުކުރު އަދާ ކުރައްވާފައެވެ. 

މި ރަސްމިއްޔާތުގައި، މި މުބާރާތް ކުރިޔަށް ގެންދިއުމުގެ އިންތިޒާމް ހަމަޖެހިފައިވާ ގޮތާއި ބެހޭގޮތުން މާލެ ސިޓީ ކައުންސިލްގެ ޑިރެކްޓަރ ޖެނެރަލް އިބްރާހިމް ރަޝީދު ދެއްކެވި ވާހަކަފުޅުގައި، ރޭވިފައިވާ އިންތިޒާމް ތަކާއި އެއްގޮތަށް މުބާރަތް ކުރިޔަށް ގެންދިއުމަށް ބެލެނިވެރިންނާއި ދަރިވަރުންގެ އެއްބާރުލުމުގެ މުހިއްމު ކަން ފާހަގަ ކުރެއްވިއެވެ. އަދި ދެވިފައިވާ ގަޑިތަކަށް ސަމާލުކަން ދެއްވުމަށާއި، މާލެ ސިޓީ ކައުންސިލުން ދެއްވާ އިރުޝާދުތަކަށް ސަމާލުކަން ދެއްވުމަށް ވަނީ އެދިފައެވެ. 

މީގެ އިތުރުން، މި މުބާރަތް ކާމިޔާބު ކަމާއި އެކު ގެންދިޔުމަށް ޓަކައި މުބާރާތުގެ ފަނޑިޔާރު ކަން ކޮށްދެއްވާ ބޭފުޅުންނަށާއި، މުބާރާތަށް އިނާމްތައް ސްޕޮންސަރ ކޮށްދެއްވާފައިވާ ފަރާތްތަކުގެ އިތުރުން މުބާރާތަށް އެކި ގޮތްގޮތުން އެހީތެރިކަން ފޯރުކޮށްދެއްވާ ހުރިހާ ފަރާތްތަށް ވަނީ ޝުކުރު އަދާކޮށްފައެވެ. 

Latest news

Latest news