މާލޭ ސިޓީ މޭޔަރ އާދަމް އާޒިމް އިއްޔެ (11 ނޮވެމްބަރު 2023) ވަނީ ދިވެހިރާއްޖޭގެ 55 ވަނަ ޖުމްހޫރީ ދުވަހުގެ މުނާސަބަތުގައި ތަހުނިޔާގެ މެސެޖެއް ފޮނުއްވާފައެވެ. މި މެސެޖު ފޮނުއްވާފައިވަނީ އެކްސް (ކުރީގެ ޓްވިޓަރ) މެދުވެރިކޮށެވެ.

މޭޔަރ އާޒިމް އޭނާގެ މެސެޖުގައި ވިދާޅުވެފައިވަނީ، މި ދުވަހަކީ ޤައުމުގެ ވެރިކަން ކުރަމުން އައި ނިޒާމަށް ބޮޑު ބަދަލެއް ގެނެސްދިން ދުވަހެއްގެ ގޮތުގައި ފަޚުރުވެރިކަމާއެކު ފާހަގަކުރާ ދުވަހެއް ކަމަށެވެ. އަދި ޖުމްހޫރިއްޔަތަށް ވެރިކަން ބަދަލުކުރި ފަހުން ރައީސްކަން ކުރެއްވި ހުރިހާ ރައީސުންވެސް އެ ބޭފުޅުންނަށް ލިބިވަޑައިގެންނެވި ފުރުސަތުގައި ވަރަށް ރަނގަޅު އަދި ފުރިހަމަ ޚިދުމަތްތަކެއް ކޮށްދެއްވާފައިވާ ކަމަށް އޭނާ ޤަބޫލުކުރައްވާ ކަމަށް ވިދާޅުވެފައިވެއެވެ.

މީގެ އިތުރުން، މޭޔަރ އާޒިމް ވަނީ ކޮންމެ އަތޮޅެއް، ރަށެއް އަދި ކައުންސިލަކީ ޙަޤީޤީ މާނައިގައި ބާރުވެރި ކުރެވިފައިވާ ތަނަކަށް ހެދުމަށް އަލުން ކަށަވަރުކުރަން ޖެހޭކަމަށް ވިދާޅުވެފައެވެ. އަދި ވެރިކަމުގެ ހުރިހާ ބާރެއް ފެށިގެން އަންނަނީ ރައްޔިތުންގެ ކިބައިން ކަމަށްވާތީ، މި ބާރު ހުރިހާ މާނައެއްގައި ހެޔޮގޮތުގައި ބޭނުންކުރުމަށް އޭނާ ގޮވާލައްވާފައިވެއެވެ.

މާލޭގެ މޭޔަރުގެ ހައިސިއްޔަތުން، ދިވެހިރާއްޖެއަކީ އިންސާފުވެރި، އަދި ކުރާ ކަންކަމުގައި ދެފުށް ފެންނަ ގޮތަށް ހާމަކަން ބޮޑުކޮށް މަސައްކަތްކުރާ ޤައުމަކަށް ހެދުމަށް ރައްޔިތުންނާއެކު އިޚްލާޞްތެރި ހިތަކާއެކު ހުރި ވާހަކަ މޭޔަރ އާޒިމް ވަނީ ވިދާޅުވެފައެވެ.

މެސެޖު ނިންމަވާލައްވަމުން، މޭޔަރ އާޒިމް ވަނީ ހުރިހާ ރައްޔިތުންނަށްވެސް އުފާވެރި ޖުމްހޫރީ ދުވަހުގެ ހެޔޮ އެދުންތައް އަރިސްކުރައްވާފައެވެ.

Mayor Adam Azim sends Republic Day Greetings