.webp)
"އިންޓަރނޭޝަނަލް މޭޔަރ ފޯރަމް 2026" ގައި ބައިވެރިވެވަޑައިގަތުމަށްޓަކައި، މާލެ ސިޓީގެ މޭޔަރ އާދަމް ޢާޒީމާއި ވިލިމާލެ ދާއިރާގެ ކައުންސިލަރު މުޙައްމަދު ސަމާޙް އިކުއެޑޯއަށް ފުރާވަޑައިގެންފިއެވެ.
މި ފޯރަމް ކުރިއަށްދާނީ މި ހިނގާ ސެޕްޓެމްބަރ މަހުގެ 29 އިން ފެށިގެން އޮކްޓޫބަރު މަހުގެ 1 ވަނަ ދުވަހުގެ ނިޔަލަށް އިކުއެޑޯގެ ވެރިރަށް ކީޓޯގައެވެ.
ދުނިޔޭގެ އެކި ކަންކޮޅުތަކުގެ މޭޔަރުންނާއި ލޯކަލް ގަވަރމަންޓްތަކުގެ އިސްވެރިން ބައިވެރިވެވަޑައިގަންނަވާ މި ފޯރަމަކީ ސިޓީތަކުގެ ތަރައްޤީއާ ގުޅޭ މުހިންމު ކަންކަމަށް މަޝްވަރާކުރުމަށް ބާއްވާ ބައްދަލުވުމެކެވެ. އެގޮތުން، ދެމެހެއްޓެނިވި ގޮތެއްގައި ސިޓީތައް ތަރައްގީކުރުމާއި، ކާރިސާތަކަށް ތައްޔާރުވެފައިވާ ރައްކާތެރި ސިޓީތަކެއް ބިނާކުރުމަށް ބޭނުންވާ މާލީ އެހީތެރިކަން ހޯދުމުގެ އިތުރުން، ދެމެހެއްޓެނިވި ތަރައްގީގެ ލަނޑުދަނޑިތައް (އެސްޑީޖީސް) ލޯކަލް ފެންވަރުގައި ތަންފީޒުކުރުމާ ގުޅޭގޮތުން ފުޅާ ދާއިރާއެއްގައި މި ފޯރަމްގައި މަޝްވަރާކުރެވިގެންދާނެއެވެ.
މި ދަތުރުފުޅުގެ ސަބަބުން މާލެ ސިޓީގެ ތަރައްޤީއަށާއި، ދިމާވާ ގޮންޖެހުންތަކުން އަރައިގަތުމަށް ބައިނަލްއަޤްވާމީ ފެންވަރުގައި އެހެން ސިޓީތަކާއެކުގައި ގުޅުން ބަދަހިވެ، މުހިންމު ތަޖުރިބާތަކެއް ލިބިގެންދާނެ ކަމަށް ބެލެވެއެވެ.
މޭޔަރ ޢާޒީމާއި ކައުންސިލަރު ސަމާޙްގެ އިތުރުން މިދަތުރުގައި މާލެ ސިޓީ ކައުންސިލްގެ ސެކްރެޓަރީ ޖެނެރަލް އަބްދުލް މުހައިމިން ނަސީރު ވެސް ބައިވެރިވެވަޑައިގަންނަވައެވެ.