ތައިލެންޑަށް ބޯކޮށް ވާރޭވެހި، ފެންބޮޑުވުމުގެ ސަބަބުން ލިބުނު ބޮޑެތި ގެއްލުންތަކާ ގުޅިގެން، ހާލުގައި ޖެހިފައިވާ އެ ޤައުމުގެ ރައްޔިތުންނަށް މާލެ ސިޓީގެ މޭޔަރ އާދަމް ޢާޒިމް ތަޢުޒިޔާއާއި ހަމްދަރުދީ ފޮނުއްވައިފިއެވެ.
މޭޔަރ ޢާޒިމް ފޮނުއްވި މެސެޖުގައި، ތައިލެންޑުގެ ރައްޔިތުންނަށް އަދި ވަކިން ޚާއްޞަކޮށް ވެރިރަށް ބެންކޮކަށް ކުރިމަތިވެފައިވާ ފެންބޮޑުވުމުގެ ނުރައްކާތެރި ހާދިސާގައި ގެއްލުން ލިބުނު އެންމެހައި ފަރާތްތަކަށް އިޚްލާޞްތެރި ހަމްދަރުދީ ވަނީ ފާޅުކުރައްވާފައެވެ. އަދި މިފަދަ ދަތި އުނދަގޫ ވަގުތެއްގައި ދިވެހިރާއްޖޭގެ ވެރިރަށް މާލެ އޮތީ ބެންކޮކުގެ ގަވަރުނަރު ޗާޓްޗާޓް ސިތިޕަން އަދި ބެންކޮކް މެޓްރޯޕޮލިޓަން އެޑްމިނިސްޓްރޭޝަނާ އެކުގައި ކަމަށް މޭޔަރު ވިދާޅުވިއެވެ.
މީގެއިތުރުން މޭޔަރ ޢާޒިމް ފާހަގަކުރެއްވި ގޮތުގައި، ބެންކޮކަކީ ޔޫ.އެން.އެސްކެޕް ފަދަ މުހިންމު އެތައް ބައިވެރިންނެއް ޤާއިމުވެ ތިބޭ، އަދި ދިވެހިރާއްޖެއާއި ދިވެހި ރައްޔިތުންނާ ވަރަށް ގާތް ގުޅުމެއް އޮންނަ ސިޓީއެކެވެ.
މޫސުމީ ބަދަލުތަކުގެ ސަބަބުން ކުރިމަތިވާ މިފަދަ ނުރައްކާތެރި ހާދިސާތަކުން ހަނދާންކޮށްދެނީ، މޫސުމަށް އަންނަ ބަދަލުތަކަށް ތައްޔާރުވެ، އެކަންކަމަށް ކެތްތެރިވުމަކީ އެންމެންގެ ވެސް އެންމެ ބޮޑު އިސްކަމެއްގެ ގޮތުގައި ހަދަންޖެހޭ ކަމެއް ކަމަށް މޭޔަރު ވިދާޅުވިއެވެ.
އަދި މޫސުމީ ބަދަލުތަކުގެ ސަބަބުން އެންމެ ބޮޑު ނުރައްކަލަކާ ކުރިމަތިލާންޖެހިފައިވާ ސިޓީތަކުގެ ގޮތުގައި، ކާރިސާތަކަށް ތައްޔާރުވެފައިވާ މިންވަރު ވަރުގަދަކޮށް، ދެމެހެއްޓެނިވި އިންފްރާސްޓްރަކްޗަރަށް އިންވެސްޓްކުރުމާއެކު، މުޖުތަމަޢުތައް ރައްކާތެރިކުރުމަށްޓަކައި އެންމެން އެކުގައި ގުޅިގެން މަސައްކަތްކުރަން ޖެހޭ ކަމަށް ވެސް މޭޔަރުގެ މެސެޖުގައި ވަނީ ފާހަގަކުރައްވާފައެވެ.