ގަދަ އަވީގައި މާލެ ސިޓީ ކައުންސިލްގެ ބިދޭސީ މުވައްޒަފުންތަކެއް މަގު ހެދުމުގެ މަސައްކަތުގައި އުޅެމުން ދަނިކޮށް، ތުއްތު ކުދިންތަކެއް އެ މުވައްޒަފުންނަށް ޖޫސް ދީ ދެއްކި ތަފާތު ރީތި ނަމޫނާއަށް މާލެ ސިޓީގެ މޭޔަރ އާދަމް ޢާޒިމް އިޚްލާޞްތެރި ޝުކުރެއް އަދާކުރައްވައިފިއެވެ.
މޭޔަރު ޢާޒިމް އެ ކުދިންނަށް ޝުކުރު ދެންނެވީ، ބާ އިންޖީނުގޭގެ ފުރަގަހަށް އޮންނަ މަގު މަރާމާތު ކުރުމުގެ މަސައްކަތް ކުރަމުންދިޔަ ވަގުތު ހިނގައިދިޔަ މި ހިތްގައިމު މަންޒަރު ދައްކުވައިދޭ ވީޑިއޯއެއް މުޙައްމަދު އައުޒަމް ނަމަކަށް ކިޔާ މީހަކު މީސްމީޑިއާގައި ޕޯސްޓުކުރުމާ ގުޅިގެންނެވެ. އެ ވީޑިއޯ ވައިރަލްވެ، އެ ތުއްތު ކުދިންގެ ނަމޫނާ އަދި އޯގާތެރި މަސައްކަތް ގިނަ ބައެއްގެ ސަމާލުކަމަށް އައިސް، އެތައް ބަޔަކު ދަނީ އެކަމަށް ތައުރީފު ކުރަމުންނެވެ.
މިކަމާ ގުޅިގެން މޭޔަރ ޢާޒިމް އެމަނިކުފާނުގެ އަމިއްލަފުޅު މީސްމީޑިއާ އެކައުންޓުތަކުގައި ވިދާޅުވީ، އެއާކޫލް ފެމިލީގެ ލޮބުވެތި ތުއްތު ކުދިން އިސްނަގައިގެން ކުރި އެ ފުރިހަމަ މަސައްކަތަށާއި، އަޅުގަނޑުމެންގެ ސިޓީއަކީ ހިތްފަސޭހަ ތަނަކަށް ހެދުމަށްޓަކައި އެކަކު އަނެކަކަށް އެހީތެރިވުމާއި، އޯގާތެރިކަމާއި، އަޅާލުން އިސްކުރުމުގެ މުހިންމުކަން ދައްކުވައިދިން ކަމަށްޓަކައި އިޚްލާޞްތެރި ޝުކުރެއް ދަންނަވާ ކަމަށެވެ.
"މޭޔަރުގެ ހައިސިއްޔަތުން، އެއާކޫލް ފެމިލީގެ ފަރާތުން މުޖުތަމައަށް ގެނެސްދިން ހެޔޮ ބަދަލާއި ތިޔަ ދެއްކެވި ހެޔޮ ރޫހު އަޅުގަނޑު ނުހަނު އިޚްލާޞްތެރިކަމާއެކު ބަލައިގަންނަމެވެ. ސިޓީއެއް ބިނާވަނީ ހަމައެކަނި މުއައްސަސާތަކަކުންނެއް ނޫނެވެ. ސިޓީއެއް ބިނާކުރަނީ އެތަނެއްގެ ރައްޔިތުންނެވެ،" މޭޔަރު ވިދާޅުވިއެވެ.
މީގެއިތުރުން މޭޔަރު ފާހަގަކުރެއްވި ގޮތުގައި، އަޅުގަނޑުމެންގެ ދަރިންނާއި ޒުވާނުންނަކީ އެކަކު އަނެކަކަށް އަޅާލުމާއި، އެހީތެރިވުމާއި، އޯގާތެރިވުމުގެ ސަބަބުން މާލެއަކީ ލޯތްބާއި، އުފާވެރިކަމާއި، އެއްބައިވަންތަކަން ފެންނަ ތަނަކަށް ހެދިދާނެކަން އަޅުގަނޑުމެންނަށް ހަނދާންކޮށްދޭ ފަރާތްތަކެވެ.
ނިންމަވާލައްވަމުން މޭޔަރު ވަނީ އެ ކުދިން ދެއްކެވި ރީތި ނަމޫނާއަށް އަނެއްކާވެސް ޝުކުރު ދަންނަވައި، އެ ދެއްކި އޯގާތެރިކަމަކީ މުޅި ސިޓީއަށް ފެތުރިގެންދާނެ ހެޔޮކަމުގެ ފެށުމަކަށް ވުމަށް އުންމީދު ކުރައްވާ ކަމަށް ވިދާޅުވެފައެވެ.