އިކުއެޑޯގައި މިހާރު ކުރިއަށްދާ "އިންޓަނޭޝަނަލް މޭޔާސް ފޯރަމް"ގެ ހަވާސާގައި، މާލެ ސިޓީގެ މޭޔަރ އާދަމް ޢާޒިމް، އެ ޤައުމުގެ މުއިސްނޭ ސިޓީގެ މޭޔަރ ޔޫރީ ކޮލޮރާޑޯ މާކޭޒްއާ ބައްދަލުކުރައްވައިފިއެވެ.
އިކުއެޑޯގެ ވެރިރަށް ކީޓޯގައި ބޭއްވުނު މި ބައްދަލުކުރެއްވުމުގައި، ލޯކަލް ގަވަރނަންސް ނުވަތަ ދާއިރާގެ އިދާރީ ހިންގުމާއި، މުނިސިޕަލް ޚިދުމަތްތައް ހަރުދަނާކުރުމުގެ އިތުރުން، ދެމެހެއްޓެނިވި ގޮތެއްގައި ސިޓީތައް ތަރައްޤީކުރުމާ ގުޅޭގޮތުން ދެ ބޭފުޅުން ވަނީ ފުޅާ ދާއިރާއެއްގައި މަޝްވަރާކުރައްވައި، ދެ ސިޓީގެ ތަޖުރިބާތައް ހިއްސާކުރައްވާފައެވެ. މީގެއިތުރުން، ދެ ސިޓީގެ ދެމެދުގައި އޮތް ގުޅުން އިތުރަށް ބަދަހިކޮށް، އެކި ދާއިރާތަކުން ގުޅިގެން މަސައްކަތްކުރެވޭނެ ފުރުޞަތުތަކާ ގުޅޭގޮތުން ވެސް މި ބައްދަލުވުމުގައި ޚިޔާލު ބަދަލުކުރެއްވިއެވެ.
މިދިޔަ ސެޕްޓެމްބަރު މަހުގެ 29 އިން ފެށިގެން މިއަދުގެ ނިޔަލަށް ކުރިއަށްދާ މި އިންޓަނޭޝަނަލް މޭޔާސް ފޯރަމަކީ ދުނިޔޭގެ އެކި ކަންކޮޅުތަކުގެ މޭޔަރުންނާއި ލޯކަލް ގަވަރމަންޓްތަކުގެ އިސްވެރިން އެއްތަނަކަށް އެއްވެ، ސިޓީތަކުގެ ތަރައްޤީއާ ގުޅޭ މުހިންމު ކަންކަމަށް މަޝްވަރާކުރުމަށް ބާއްވާ ބައިނަލްއަޤްވާމީ ބައްދަލުވުމެކެވެ.
މި ފޯރަމްގެ މައިގަނޑު ބޭނުމަކީ ދެމެހެއްޓެނިވި ގޮތެއްގައި ސިޓީތައް ތަރައްޤީކުރުމާއި، ކާރިސާތަކަށް ތައްޔާރުވެފައިވާ ރައްކާތެރި ސިޓީތަކެއް ބިނާކުރުމަށް ބޭނުންވާ މާލީ އެހީތެރިކަން ހޯދުމުގެ މަގުތައް ފަހިކުރުމެވެ. މީގެއިތުރުން، އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތައް (އެސްޑީޖީސް) ލޯކަލް ފެންވަރުގައި އެންމެ އެދެވޭ ގޮތެއްގައި ތަންފީޒުކުރުމާ ގުޅޭގޮތުން ވެސް މި ފޯރަމްގައި މުހިންމު މަޝްވަރާތަކެއް ކުރިއަށްދެއެވެ.
މި ދަތުރުފުޅުގެ ސަބަބުން މާލެ ސިޓީގެ ތަރައްޤީއަށާއި، ސިޓީއަށް ދިމާވާ އެކިއެކި ގޮންޖެހުންތަކުން އަރައިގަތުމަށް ބައިނަލްއަޤްވާމީ ފެންވަރުގައި އެހެން ސިޓީތަކާއެކު ގުޅުން ބަދަހިވެ، ބޭނުންތެރި ގިނަ ތަޖުރިބާތަކެއް ލިބިގެންދާނެ ކަމަށް މާލެ ސިޓީ ކައުންސިލުން ފާހަގަކުރެއެވެ.
މި މުހިންމު ފޯރަމްގައި ބައިވެރިވެވަޑައިގަންނަވާ މާލެ ސިޓީ ކައުންސިލްގެ ވަފުދުގައި މޭޔަރ އާދަމް ޢާޒިމްގެ އިތުރުން، ވިލިމާލެ ދާއިރާގެ ކައުންސިލަރު މުޙައްމަދު ސަމާޙް އަދި ސިޓީ ކައުންސިލްގެ ސެކްރެޓަރީ ޖެނެރަލް އަބްދުލް މުހައިމިން ނަސީރު ވެސް ބައިވެރިވެވަޑައިގަންނަވައެވެ.