މާލޭގެ މަގުތަކުގެ ކަންކަންމަތީގައި ޤަވާއިދާ ޚިލާފަށް ޕާކުކުރުމުގެ ސަބަބުން ދިމާވާ ދަތިތަކަށް ހައްލެއް ހޯދައިދިނުމުގެ ގޮތުން، މި އަހަރުގެ މިހާތަނަށް މާލޭގެ 317 މަގެއްގެ ކަންމަތީގައި ޕާކުކުރުން މަނާކަން އަންގައިދޭ ރީނދޫ ކުލައިގެ ދެ ރޮނގު ދަމައިފިއެވެ.
މާލެ ސިޓީ ކައުންސިލްގެ ރޯޑް މެނޭޖްމަންޓް ސެކްޝަންގެ ތަފާސްހިސާބުތަކުން ދައްކާގޮތުގައި، މިއަހަރުގެ ޖެނުއަރީ މަހުން ފެށިގެން ސެޕްޓެމްބަރު މަހުގެ ނިޔަލަށް ކުރިއަށް ގެންދިޔަ މި މަސައްކަތަކީ މާލޭގެ މަގުތަކުގެ ޓްރެފިކް ތޮއްޖެހުން ކުޑަކުރުމަށްޓަކައި ކައުންސިލުން ނިންމާފައިވާ މުހިންމު ނިންމުމެއްގެ ދަށުން ކުރިއަށްގެންދާ ކަމެކެވެ.
މިކަމާ ގުޅޭގޮތުން މާލެ ސިޓީގެ މޭޔަރ އާދަމް ޢާޒިމް ވިދާޅުވީ، މަގުތަކުގެ ކަންކަންމަތީގައި އުޅަނދުތައް ޕާކުކުރުމުގެ ސަބަބުން މަގުތައް ވަރަށް ބޮޑަށް ތޮއްޖެހި، ދަތުރުފަތުރަށް ބޮޑެތި ހުރަސްތަކެއް އެޅެމުންދާ ކަމަށެވެ. އަދި ކަންމަތީގައި ރީނދޫ ރޮނގު ދަމައި ފާހަގަކުރުމުން އެ ސަރަޙައްދުތަކުގައި ޕާކު ނުކުރެވޭނެ ކަމަށާއި، އެއީ ޤަވާޢިދުން މަނާކަމެއްކަން ހުރިހާ ރައްޔިތުންވެސް ދަންނަންޖެހޭނެ ކަމަށް މޭޔަރު ފާހަގަކުރެއްވިއެވެ.
މާލެ ސިޓީ ކައުންސިލުން ފަށާފައިވާ މި މަސައްކަތަކީ މާލޭގެ މަގުތަކަކީ ހިނގާބިނގާވެ އުޅޭ ފަރާތްތަކަށާއި ދުއްވާ އެއްޗެއްސަށް ފަސޭހަ އަދި އަމާން ރައްކާތެރި ތަނަކަށް ހެދުމަށްޓަކައި އެޅުނު މުހިންމު ފިޔަވަޅެކެވެ.
ކުރިއަށް އޮތް ތަނުގައިވެސް މާލޭގެ އެކި ސަރަޙައްދުތަކުގައި މިފަދައިން ރޮނގުދެމުމުގެ މަސައްކަތް މެދުކެނޑުމެއްނެތި ސިޓީ ކައުންސިލުން ކުރިއަށް ގެންދާނެއެވެ.