މާލޭގެ ކެނެރީމަގުގެ ޕޭވްމަންޓްތަކާއި މަގުގެ ހާލަތު ރަނގަޅުކުރުމަށްޓަކައި ކުރިއަށްގެންދާ މަރާމާތުކުރުމުގެ މަސައްކަތްތައް މާލެ ސިޓީ ކައުންސިލުން ފަށައިފިއެވެ.
މި މަސައްކަތަކީ މާލޭގެ މަގުތައް އަމާން އަދި ހިނގާބިނގާވެ އުޅުމަށް ފަސޭހަ ތަނަކަށް ހެދުމަށް ސިޓީ ކައުންސިލުން ކުރިއަށްގެންދާ ޚާއްޞަ މަޝްރޫޢުގެ ބައެކެވެ.
މި މަސައްކަތާ ގުޅޭގޮތުން މާލެ ސިޓީގެ މޭޔަރ އާދަމް ޢާޒިމް ވިދާޅުވީ، ކެނެރީމަގުގެ ޕޭވްމަންޓްތައް މަރާމާތުކުރުމުގެ މަސައްކަތަކީ އާންމު ރައްޔިތުންނަށް ދިމާވާ ދަތިތައް ހައްލުކުރުމަށް އިސްކަންދީގެން ކުރިއަށްގެންދާ މުހިންމު މަސައްކަތެއް ކަމަށެވެ. އަދި މަގުތަކުގެ ފެންވަރު ރަނގަޅުކުރުމަކީ ކައުންސިލްގެ އެންމެ އިސް އެއް އަމާޒުކަން ވެސް މޭޔަރ ވަނީ ފާހަގަކުރައްވާފައެވެ.
މި މަރާމާތުގެ ދަށުން ކެނެރީމަގުގެ ހަލާކުވެފައިވާ ސަރަހައްދުތައް މަރާމާތުކުރުމާއި، އަލުން ޕޭވްމަންޓް ގާ އެތުރުމުގެ މަސައްކަތް ކުރިއަށްދާނެއެވެ. މީގެ އިތުރުން އެ މަގު ބޭނުންކުރާ ފަރާތްތަކަށް ރައްކާތެރިކަން ކަށަވަރުކުރުމުގެ ގޮތުން އަޅަންޖެހޭ އެންމެހައި ފިޔަވަޅުތައް އެޅުމަށް ވެސް ކައުންސިލުން ވަނީ ނިންމާފައެވެ. ކެނެރީމަގަކީ އާންމުކޮށް ގިނަ އަދަދެއްގެ ރައްޔިތުން ބޭނުންކުރާ މަގަކަށް ވުމާއެކު، މި މަސައްކަތް ނިމުމުން ހިނގާބިނގާވެ އުޅޭ މީހުންނަށާއި ދުއްވާ އެއްޗެއްސަށް ބޮޑެތި ލުއިފަސޭހަތަކެއް ލިބިގެންދާނެއެވެ.
މާލެ ސިޓީ ކައުންސިލުން ދަނީ މާލޭގެ އެހެން ސަރަހައްދުތަކުގެ މަގުތައް މަރާމާތުކުރުމުގެ މަސައްކަތް ވެސް މެދުކެނޑުމެއްނެތި ކުރިއަށް ގެންދަމުންނެވެ. އެގޮތުން، މާލޭގެ މަގުތަކަކީ އަމާން، ރައްކާތެރި އަދި ހިނގާބިނގާވެ އުޅެން ފަސޭހަ ތަނަކަށް ހެދުމަށް ކުރިއަށްގެންދާ މަޝްރޫޢުގެ ދަށުން، މި އަހަރުގެ ޖެނުއަރީ މަހުން ފެށިގެން ސެޕްޓެމްބަރު މަހުގެ ނިޔަލަށް މާލޭގެ 180 މަގެއް މަރާމާތުކޮށް މިހާރު ވަނީ ނިންމާފައެވެ.