މާލޭގައި މިވަގުތު ފެންނާން ހުރި، އިސްލާމީ ވަޙްދަތާއި ދީނި ތާރީޚު ހެކިދޭ އެންމެ ގަދީމީ އެއް ބިނާކަމަށްވާ، މާލޭގެ ހުކުރު މިސްކިތުގެ ގޯތެރެ ޒީނަތް ތެރިކޮށް ބޭވުމަށް ސަރުކާރާއެކު މަޝްވަރާ ކުރައްވާނެ ކަންތައްތަކެއް ފާހަގަ ކުރައްވާފައިވާ ކަމަށް، މާލޭ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ.
މާލޭގެ ހުކުރު މިސްކިތުގެ ގޯތިތެރެ ޒީނަތްތެރިކޮށް ބޭވުމަށް ސަރުކާރާއެކު މަޝްވަރާ ކުރައްވާނެ ކަމަށް މޭޔަރ ޢާޒިމް ވިދާޅުވެފައިވަނީ، މާލެ ސިޓީގައި ހުރި މި ފަދަ އާސާރީ ތަންތަނުގެ ޙާލަތު ދެނެގަތުމަށް ކުރައްވަން ފައްޓަވާފައިވާ ޒިޔާރަތުގެ ތެރެއިން، މާލޭގެ ހުކުރު މިސްކިތަށް ކުރެއްވި ޒިޔާރަތުގެއަވެ.
އާދިއްތަ ދުވަހު ހަވީރު މޭޔަރ ޢާޒިމް ހުކުރު މިސްކިތަށް ވަޑައިގެން މިސްކިތުގެ އެތެރެއާއި ގޯތި ތެރެ ބައްލަވައިލެއްވުމަށް ފަހު ވިދާޅުވީ، މާލެއަކީ މި ސަރަހައްދުގައި އޮތް ވެރިކަން ކުރާތާ އެންމެ ގިނަ ދުވަސްވީ އެންމެ ގަދީމީ ރަށަށް ވީހިނދު، މާލޭގައި ހުރި، ސަގާފީ މާއްދީ ތަރިކަ ރައްކާތެރިކޮށް އަންނާންއޮތް ޖީލުތަކަށް ގެންގޮސް ދިނުމަކީ ކޮންމެހެން ވެސް ކުރަންޖެހިފައިވާ ކަމެއްކަމަށެވެ. އެ ގޮތުން ހުކުރު މިސްކިތުގެ ގޯތިތެރޭ ގަސް އިންދުމުގެ އިތުރުން ގޯތިތެރެ ޒީނަތްތެރިކުރުމާއި މިސްކިތުގެ ގޯތިތެރެ ސާފުކޮށް ބޭއްވުމަށް، ދިވެހި ބަހާއި ސަގާފަތާއި ތަރިކައާ ބެހޭ ވުޒާރާއާއެކު މަޝްވަރާ ކުރައްވާނެ ކަމަށް، މޭޔަރ ޢާޒިމްގެ ވާހަކަފުޅުގައި ފާހަގަ ކުރެއްވިއެވެ.
މާލޭގެ ހުކުރު މިސްކިތަކީ، ދިވެހީންގެ އިސްލާމީ ވަޙުދަތު އަދި ޖީލުތަކަށް ދެމިގެން އައިސްފައިވާ ދީނީ ތާރީޚަށް ހެކިދޭ އެހާމެ މުހިންމު އަދި ޚާއްޞަ ބިނާއެވެ. މިސްކިތުން ފެންނަ ހިރިގަލު ވަޑާމާއި ލިޔެލާޖަހައި ލާފެންކޮށްފައިވާ ލަކުޑީގެ މަސައްކަތަކީ، އެ މަސައްކަތުގައި ދިވެހިންނަން ލިބިފައިވާ ހުނަރާއި ކުޅަދާނަކަމަށް މިސާލު ދައްކުވައިދޭ ދިވެހި ފަންނުވެރިކަމުގެ ފުރިހަމަ ނަމޫނާއެކެވެ.
ދިވެހި ތާރީޚް ބުނާގޮތުން މާލޭގެ ހުކުރު މިސްކިތް، މިހާރު ފެންނާން ހުރި ގޮތަށް އެންމެ ފަހުން ބިނާ ކޮށްފައިވަނީ، އިސްކަންދަރު ރަސްގެފާނުގެ ރަސްކަމުގެ ޙިޖުރައިން 8 ވަނަ ގަރުނުގައެވެ. އަދި އެ މިސްކިތަކީ ރާއްޖޭގެ ރައްޔިތުންނަށް، މާތްވެގެންވާ އިސްލާމް ދީނުގެ ހިދާޔަތު ހޯއްދަވައި ދެއްވި، ދަރުމަވަންތަ ރަސްގެފާނު ބިނާކުރައްވި މިސްކިތެކެވެ. އޭގެ ފަހުން ޝިހާބުއްދީން ރަދުންގެ ރަސްކަމުގައި އެ މިސްކިތް އާ ކުރައްވާފައިވާ ކަމަށް، ދިވެހި ތާރީޚު ދިރާސާކުރައްވާ ފަރާތްތަކުން ހާމަކުރައްވާފައިވާ މަޢުލޫމާތު ތަކުން އެނގެން އެބަހުއްޓެވެ.
މާލޭގެ ހުކުރު މިސްކިތުގެ މިހާރުގެ ހާލަތު ބައްލަވައި ލެއްވުމަށް މޭޔަރ ޢާޒިމްއާކު، ހުޅުމާލެ ދައިރާގެ ކައުންސިލަރު ޢަލީ އައިމަނާއި ކައުންސިލްގެ އިސް ބައެއްވެރިން ވެސް ބައިވެރިވެ ވަޑައިގެންނެވިއެވެ.