ކުޑަ ޢީދަށް މާލެ ސަރަހައްދު ކުލަ ބޮކިތަކުން ދިއްލުމުގެ މަސައްކަތުގައި މާލެ ސިޓީގެ ޑެޕިއުޓީ މޭޔަރ މުޙައްމަދު ޢަރީޝާއި ބައެއް ކައުންސިލަރުން ބައިވެރިވެ ވަޑައިގެންފިއެވެ.
މި ފަހަރުގެ ކުޑަ ޢީދުގައި މާލެ ސަރަހައްދު ދިއްލުމުގެ މަސައްކަތް ކުރިއަށް ގެންދަނީ، މާލެ ސިޓީ ކައުންސިލާއި ސިޓީސް މިނިސްޓްރީ އަދި ސްޓެލްކޯ ގުޅިގެންނެވެ.
އާދިއްތަ ދުވަހުގެ ރޭ ކުރެވުނު މަސައްކަތުގައި، މާލެ ސިޓީގެ ޑެޕިއުޓީމޭޔަރުގެ އިތުރުން، ހުޅުމާލެ ދާއިރާގެ ކައުންސިލަރު ޢަލީ އައިމަނާއި މާފަންނު ދެކުނު ދާއިރާގެ ކައުންސިލަރު ހަސަން ނިޡާމް ވެސް ވަނީ ބައިވެރިވެ ވަޑައިގެންފައެވެ.
މި ފަހަރުގެ ކުޑަ ޢީދުގައި، ސަރުކާރުން، ސެންޓަރަލް ތަނެއްގެ ގޮތުގައި ބޮޑަށް ދިއްލުމަށް ހަމަޖައްސާފައިވަނީ، ހުޅުމާލެ ސެންޓަރަލް ޕާކެވެ. ޢީދާ ގުޅިގެން، ބާއްވާ ރަސްމިއްޔާތު ވެސް މި ފަހަރު އޮންނާނީ، ސެންޓަރަލް ޕާކުގައެވެ.
މި އަހަރުގެ ކުޑަ ޢީދުގައި ވެސް، މާލެ ސަރަހައްދުން ފެންނަން ހުންނާނެ ކުލަބޮކި ލައިޓު ތަކުގެ ތެރޭގައި، ޢީދުގެ އެކި ކަހަލަ ޝިއާރުތައް ހިމެނޭ ލައިޓްތަކާއި ޢީދު ރަމްޒުކޮށްދޭ އެހެނިހެން މަންޒަރުތަކުގެ ލައިޓްތައް ވެސް ހިމެނެއެވެ.
މާލޭގެ އިތުރުން މި އަހަރު ރާއްޖޭގެ 36 ރަށެއް ދިއްލުމަށް ސަރުކާރުން އަންނަނީ މަސައްކަތް ކުރައްވަމުންނެވެ.