މާލޭގައި މީދާ ގިނަވުމުގެ ސަބަބުން، މީދާ މެރުމަށް މާލެ ސިޓީ ކައުންސިލުން ފެށި ޚާއްޞަ ހަރަކާތުގެ ތެރެއިން، މި ހިނގާ ޖެނުއަރީ މަހުގެ 25 ވަނަ ދުވަހުގެ ނިޔަލަށް 299 މީދާ މަރައިފިއެވެ.
16 ޑިސެމްބަރ 2025 ވަނަ ދުވަހު މާލެ ސިޓީކައުންސިލުން ފެށި މީދާ މެރުމުގެ މަސައްކަތް ކާމިޔާބުކަމާއެކު ކުރިޔަށް އެބަދެއެވެ.
މީދާ މެރުމަށް ކައުންސިލުން ފުރަތަމަ ބޭސް ލީ، މާލޭގެ އެންމެ ކާރުބާރުބޮޑު އެއް ސަރަހައްދު ކަމަށްވާ ލޯކަލް މާރުކޭޓް ސަރަހައްދަށެވެ. އެ ސަރަހައްދާއެކު މީދާ މެރުމަށް، ޖުމުލަ 69 ތަނަކަށް ވަނީ ބޭސް ލާފައެވެ.
މޭޔަރ އާދަމް ޢާޒިމް ވިދާޅުވީ، މި ހަރަކާތް ހިންގަނީ ކައުންސިލްގެ މުވައްޒަފުން ކަމަށާއި، މި ހަރަކާތުގެ ސަބަބުން މާލޭގެ ސާފުތާހިރުކަން އިތުރުވެ، ރައްޔިތުންނަށް ކުރިމަތިވަމުންދާ، މީދަލުގެ އުނދަގޫ ކުޑަވާނެ ކަމަށް ވިދާޅުވިއެވެ.
މި ހަރަކާތުގެ ތެރެއިން މީދާ މަރުވުމުން، އެ މީދާތައް ނެގައި އެއްކުރުމުގެ މަސައްކަތް ވެސް ކުރާނީ މާލެ ސިޓީ ކައުންސިލުންނެވެ.
މިހަރަކާތަކީ މާލެ ސިޓީ ކައުންސިލްގެ ހެލްތް ޕޮލިސީގެ ދަށުން ކުރިއަށް ގެންދާ ހަރަކާތެކެވެ.