ވިލިމާލޭގައި މަދިރި ކޮންޓްރޯލް ކުރުމަށް މާލެ ސިޓީ ކައުންސިލުން ކުރިއަށްގެންދާ ހަރަކާތްތަކުގެ ތެރެއިން، ނިމިދިޔަ ޖުލައި މަހު އެކަނިވެސް 107 ތަނެއް ނުވަތަ ތަކެތި ވަގުތުން އިސްލާހުކޮށްފި އެވެ.
މާލެ ސިޓީ ކައުންސިލްގެ ޕެސްޓް ކޮންޓްރޯލް ޔުނިޓުގެ ތަފާސް ހިސާބުތަކުން ދައްކާ ގޮތުގައި، ޖުލައި މަހުގެ 1 އިން 31 ގެ ނިޔަލަށް ކުރިއަށް ގެންދިޔަ މި އޮޕަރޭޝަންގައި ޖުމްލަ 89 ގެއަކާއި އެކި ތަންތަން ބަލައި ޗެކްކޮށްފައިވެއެވެ. މި އިންސްޕެކްޝަންތަކުގެ ތެރެއިން މަދިރި އުފެދޭ ގޮތަށް ހުރި 124 ތަނެއް ނުވަތަ ތަކެތި ވަނީ ފާހަގަކުރެވިފައެވެ.
މި މަސައްކަތުގެ ތަފްސީލަށް ބަލާއިރު، 42 ތަނަކުން ނުވަތަ އެއްޗަކުން މަދިރި ފަނި ފެނިފައިވާއިރު، 19 ތަނަކުން މަދިރި ފެނިފައިވާކަން ވަނީ ފާހަގަކުރެވިފައެވެ. މީގެ އިތުރުން، ސިއްހީ ގޮތުން މައްސަލަ ހުރި ކަމަށް ފާހަގަކުރެވުނު 9 ގެއެއް ނުވަތަ ތަނެއް ބަލައި ފާސްކޮށްފައިވެއެވެ.
މަދިރި ކޮންޓްރޯލް ކުރުމުގެ ފިޔަވަޅެއްގެ ގޮތުން، ޖުމްލަ 19 ތަނަކަށް ނުވަތަ ތަކެއްޗަށް ބޭސް އަޅާފައިވާ ކަމަށްވެސް ޕެސްޓް ކޮންޓްރޯލް ޔުނިޓުގެ ހިސާބުތަކުން ދައްކައެވެ. މިއީ މަދިރީގެ ޒަރީއާއިން ފެތުރޭ ބަލިތައް ކޮންޓްރޯލް ކުރުމަށް ކުރެވޭ މުހިންމު މަސައްކަތެކެވެ.
މާލެ ސަރަހައްދުގައި މަދިރީގެ ޒަރީއާއިން ފެތުރޭ ބަލިތައް މަދުކުރުމަށްޓަކައި މާލެ ސިޓީ ކައުންސިލުން އަންނަނީ މެދުކެނޑުމެއް ނެތި މަސައްކަތް ކުރަމުންނެވެ. މިގޮތުން ވިލިމާލޭގެ އިތުރުން މާލޭގެ އެކި ސަރަހައްދުތަކުގައިވެސް މިފަދަ އިންސްޕެކްޝަންތައް ކުރިއަށް ގެންދިއުމަށް ވަނީ ރޭވިފައެވެ.