މާލެ ސިޓީ ކައުންސިލްގެ މި ހިނގާ ދައުރު، 2026 ވަނަ އަހަރު ނިމޭއިރު، ރާއްޖޭގެ އެންމެން، އެންމެ އިތުބާރު ކުރާ، އެންމެން، ނަމޫނާއަކަށް ދޭކޭ، ރަނގަޅަށް ހިނގާ ކައުންސިލަށް މާލެ ސިޓީ ކައުންސިލް ހައްދަވާނެ ކަމަށް މާލެ ސިޓީގެ މޭޔަރ އާދަމް ޢާޒިމް ވިދާޅުވެއްޖެއެވެ. އެ މަނިކުފަނު މި ފަދައިން ވިދާޅުވީ، މާލެ ސިޓީ ކައުންސިލްގެ 4 ވަނަ ދައުރުގެ 161 ވަނަ ޢާއްމު ޖަލްސާގައި ވާހަކަފުޅު ދައްކަވަމުންނެވެ. އެ މަނިކުފާނު ވިދާޅުވީ، މި ވަގުތު މާލެސިޓީ ކައުންލަށް އިންތިޚާބުވެ ވަޑައިގެންފައިވާ ހުރިހާ ކައުންސިލަރުންގެ ވަރަށް ފުރިހަމަ އެއްބަރުލެއްވުމެއް، އެ މަނިކުފާނަށް ލިބިވަޑައިގަންވާ ކަމަށާއި އެ ބޭފުޅުން އެ ގޮތުގައި މަސައްކަތްޕުޅު ކުރައްވާނަމަ، އެ މަނިކުފާނު ގެންނަވަން ބޭނުންފުޅުވެޑައިގަންނަވާ ބަދަލުތައް ގެންނެވުމަކީ އުދަގޫ ކަމަކަށް ނުވާނެ ކަމަށެވެ.
މޭޔަރުގެ ވާހަކަފުޅު ކުރިޔަށް ގެންދަވަމުން ވިދާޅުވިގޮތުގައި، މި ވަގުތު މާލެ ސިޓީ ކައުންސިލް ހިނގަމުންދަނީ، މާލޭގެ އެކި ސަރައްހައްދުތަކުގައި ހުރި، 8 ޢިމާރާތެއްގައިކަމަށާއި، މި ކަން ބަދަލުކޮށް، ކައުންސިލްގެ ހުރިހާ ސެކްޝަންތަކެއް، އެއް ޢިމާރާތެއްގައި ހިންގޭނެ ގޮތް ހެއްދެވުމަށް މަސައްކަތްޕުޅު ކުރައްވަމުން ގެނދަވާ ކަމަށާއި އެ ގޮތަށް ހެދިއްޖެ ނަމަ، ރައްޔިތުންނަށް ޚިދުމަތް ދިނުމުގައި ވަރަށް ބޮޑަށް ފަސޭހަ ވެގެންދާނެ ކަމަށެވެ